Jowai: Sa ha iwi i ya tyrrah kari wa jia ynne ka sngi, ka wi ka kari kamai (Tourist) Alto 800 wa em ya u number ML-04C-1144 wa wan na Jowai yow lai cha Guwahati manda poi ko ha Puriang Wah Mynso da chah tyrrah ko nadien ha ka wi ka Truck wa kit Clinker wa em ya u number AS-01FC-2577 kawa da jan hap cha synrang hadien wa tyrrah ko.
Hapoh kani ka Alto da mynsoo ar ngut ki kynthai wa tip kam ka Lehbha Suchiang (44 snem) wa ka Deliwin Biam (40 snem) wei da kit ya ki cha Mawryngkneng PHC yow cha sumaar ki wei da pyllait noh ya ki hadien wa ym em mynsoo joor ki.
Da em leh sa arngut kiwa da liwan hadien wa mih ki na Mawryngkneng Police Station ki wym yoh pyrtuid ki pulit kiwa da ku da kiwi ki kari katwa ya uwa yah won da tip kam u Eladmi Lathong (23 snem).
Katkam wa pyntip ki pulit da ong ka Alto da chah tyrrah ko ha ka truck wa kit Clinker nadien wei her ko hapoh ka truck wa em ha khmat wa em ya u number AP-16-5277 hadooh wa da pra ka kari phrai ne tangwa da embhah wow wa ym em wa yap kamjooh kiwa mynsoo joor.
Kiwa yah kini ki artylli ki truck da yut ki wei hadien won uwa yah ya ka truck wa em ha khmat da wan mih u ha Police Station, Mawryngkneng uwa tip kam u Firoz Hussian uwa na Bihar katwa uwa tyrrah won ya ka Alto ym pu em chem ya oo.
Discussion about this post