Ha iwi i jia wa yoo chyrkhei, kawi ka kari SUV da tyrrah ko ya ki bru wa lai paidbah kam chibynta i lai pynngam um ya ki Blai Durga iwa man leh kam chibynta ka lehkmen Dussehra iwa da jia ha Jashpur Nagar, Chattisgarh ynne ka sngi.
I Video wa da pynpoor bha ha ki Social Media da pynyoo ya kawi ka kari wa pynhær bha kawa da wan wei tyrrah naphang ya ki bru wa dang em ha sarok kiwa lai lang yow pynngam um ya ka Blai Durga ha Raigad Road, Pathalgaon.
Ha ini i jia da yap uwi uwa 21 snem wei da mynsoo joor bha 4 ngut wa 16 ngut kiwi kiwa mynsoo kiwa da kit ya waroh cha Pathalgaon Civil Hospital yow yoh yei sumaar.
Kani ka kari toh kiwa kit bhang chiboon bha wei toh kawa yut wei da yoh wow kem ka da ki bru heiwa da dat ya ki kiwa yah ka heiwa da kem ya ki arngut da ki pulit hadien wa thang ki bru ya kani ka kari.
Kiwa chah kem da tip kam u Bablu Vishwakarma wa u Shishupal Sahu kiwa waroh ar na Madhya Pradesh wei toh kiwa lai luti na Chhattisgarh.
Neiliang u Chief Minister ka Chhattisgarh da beiñ u ya ini wa jia deiwa ong wa daw pynchitom ya kini kiwa emkti katkam ka aiñ wei da phah u leh yei sñiawlem cha kiwa hayung kiwa yap.
