Hajrong i pynkreh (Work Execution) ya ka JJM Project hapoh ka chnong Ialong, neiliang ka Dong Lutituber Social Welfare Club (LSWC) Ialong hadien wa da chem ko yei pynkreh tangdep hapoh i pait i sylli ka PHE (RWSS) heiwa ym yoo yahaap katkam ka poisa wa da mang yow wanrah ya ka um dih hapoh chnong poh thaw.
Hajrong ini, ka LWSC da lai ko chakhmat wow ujor da ka PIL hapoh ka yung bichaar High Court ka Meghalaya neibynta u pynbiang ya ka um dih kamwa da mang wow pynpoi cha waroh ki manyung kiwa toh hok u yoh ya ka um.
Ini i ujor PIL pyrchah ya ka PHE mih i hadien wa ki dkhot ka LWSC da mih ki chakhmat wow thooh yutip lyngba ka RTI hadien wa kiwa chong chnong hapoh ka Dong LWSC ym yoh de ki ya ka um dih kawa biang wot hadien wa dadep ka PHE (RWSS) u pynsakhiat lyngba ki Certificate wa da ye u pyndep ya ki bynta yong ka Project wa da mang hei lut wa Rs. 3,57,37,500 (Le klur sanphaw ynñiaw lak le phaw ynñiaw hajar sanspah tangka).
Katkam ka Certificate wa em tarik 01.08.2022 wa da phah cha ki bor wow sylli (Authority) ya ka JJM ha Delhi heiyatoh wa i pynkrehkaam ya ka JJM Project ha chnong Ialong iwa da pynkreh ka VWSC Ialong wei pynskem da ka PHE (RWSS), ha ka Report da ong wa yei kreh hapoh ka chnong Ialong da ye u pyndep ha waroh ki bynta wa da mang ya ka poisa katkam i thmu wow pynpoi um dih cha ki manyung yong kiwa chong chnong ka Dong LWSC kamjooh cha kiwa chong chnong ka chnong Ialong wa kynthup leh cha waroh ki skur, Aganwadi Centre, GP Building, Health Centre wa Asharmshala.
Tangwa hei sakhiat iwa da mih ha katai ka Certificate Report ka VWSC wa da pynskem da ka PHE, RWSS man i mar khangtleiñ neidaw wa hadooh katni nadooh u snem 2022 ym em ki manyung hapoh ka Dong LSWC næ ka chnong wa kamjooh ki skur, Aganwadi Centre, GP building, Health Centre wa Asharmshala kiwa da yoh ya ka um dih katkam wa da thmu wow pynpoi hapoh ka Project.
Heiyatoh wa ini i wym ye u pynpoi ya ka umdih katkam i thmu, neiliang ki dkhot ka LWSC dadep ki u lai yachem wa ki bor ka District ka West Jaiñtia Hills wow paan yarap heiyatoh wa kani ka kaam wei na ki bor ka District hadein wa da sñiawthooh ya itai i kaam habra da pynman ya ka Enquiry lyngba ka Spot Inspection tangwa wot hadien wa da chem ya chiboon ki wym biang katkam wa dadep u pynlut neibynta katai ka kreh JJM hapoh ka chong Ialong, ki bor ka District kat hadooh kini ki sngi ym em iwon iwon i yarap wow pyndep neibynta i myntoi ki paidbah.
Ini i wym ye ki bor District wow yarap hajrong i eh i khor ya ki paidbah wa ka chnong, da pynbor leh ya ki manyung wow thied ya ka um dih iwa dang joor katwa ki snem dang lai ki khamtam ha i tlang.
Katwa kamtæ ini da pynbor i ya ki bor yong ka Dong LWSC wow chimkhia ya ini i kaam hadien wa ki manyung da dooh ki yei hok yong ki wow yoh ya ka um dih kawa biang lyngba katai ka JJM Project.
Discussion about this post