U Nidamon Chullet da chah ujor u heiyatoh wa ki kaam maham bru wei pynkulmar u ha chnong Kyndongtuber ha i thaw wa tip kam ka Madan Treilang ha ka 25 tarik uni u bnai heipor 10:30 i miet.
Ha kani ka ujor kawa da e ha Phramer Traffic Cell ha ka 26 tarik uni u bnai da u Selfdenial Lyngdoh uwa man leh kam u diah u Richard Lyngdoh, kyrtong ka Congress na 3-Raliang. Da ong wa u Nidamon da lai maham bru u wei da pynkulmar u neidaw wa kiwa chong chnong kani ka thaw da khang pyrchah ki ya oo wow psiah chapoh chnong yow khanglaad u wan thong poisa u ha ini por Election neibhah da em chwa ka rai ka chnong wow ya krehlang waka sorkar.
Da ong wa u Nidamon da wan u ha katai ka thaw da kawi ka kari Bolero (rong soo) ka wym em Number Plate wei hadien wa kiwa chong chnong da pyrchang ki wow yaklam wa oo, tangwa da chah maham noh ki ha u Nidamon wei da maham u leh ya ki wym toh u kyrchaan ya u kyrtong ka Congress.
Kamtæ neiliang u Selfdenial hadien wa pyntip cha oo ya ini da lai u wut-wut cha ini i thaw yow yachem wa u Nidamon heipor kamwa duna 12:00 waje i pyrdi synyaaw tangwa u Nidamon ym em du ha ini i thaw.
Ha ka FIR da ong wa ini toh iwa sñiawsih wei kam ha kini ki por, u Nidamon da man u kam uwa kyrchaan ya uwi napyrdi ki kyrtong wa yakhun Election na ka 3-Raliang Constituency wei ini i maham u ya ki bru da pynsier ko ya kiwa chong chnong neibhah uni u bru toh u damok uwa da em hapyrdi boon ki yakhun ya kiwa boon ki chah pynbaad chah pharep u wa kynthup ya ki kaam pynyap bru kawa dang chah bichaar u hadooh katni.
Kamtæ da ong wa na ini i daw hawa maham u ya ki bru, kiwa chong chong kamjooh kiwa kyrchaan ka Congress da chongsier ki wei da booh ya ki hei maa hadooh wa da tieñ ki wow lai thap Vote wei kam kiwa kyrchaan ka Congress kamjooh kiwa chong chnong emkaam ki ya ka hok wow jied ya uwa mihkhmat khlem da pynbor da kiwon kiwon.
Ya kani ka FIR da phah leh cha u SP ka West Jaiñtia Hills District.
Puræ leh: Phah bichaar biang ka High Court ya u Nidamon Chullet deiwi nadooh wa sdang
