Shillong: Katwa waroh ki kyrtong wa yakhun ya ka Election MP da pynsñiaw ki yei sñiaw skem wow yoh yei jop ha kani ka Election. U kyrtong ka BJP na Shillong, u Sanbor Shullai da pynkhyrngiat u ya kiwa boon deiwa pynbna u wow chim syndon ya i mynsien lada pynman aiñ ya ka Citizenship Amendment Bill ha ka jylla.
Da ong u wa ym sñiawphær u lada pynkrehkaam ya ka CAB cha kiwi ki bynta ka ri wei yow pynlait ya ka jylla Meghalaya wa kiwi ki thaaiñ Northeast waroh kawi.
“Kamwa nga da phah da ka dorkhat nadooh wa sdang cha u Montri Rangbahdooh ka ri, u Narendra Modi, nga dawa bait O wa ya ka CAB toh u pynlait na ka jylla Meghalaya wa ki jylla ka dong mihsngi,” da ong u.
Hajrong ini i klam u kyrtong ka BJP uwa man leh kam u MLA na South Shillong Constituency, neiliang u Presiding Officer ka Sankerdev Polling Station i thaw wa da klam u Sanbor ya ini waroh da ujor u hakhmat ki pulit hajrong ka yurim wa da pynchongchit u ya kiwa thap Vote ha kani ka Polling Station wow jied ya ka BJP nei rukom klam yong oo.
U Chief Electoral Officer (CEO) u Federick R Kharkongor da pyntip u wa mar ya tip ya ini i klam yong u kyrtong ka BJP, neiliang ka chnat Election da phah ko ya u Returning Officer katai ka Polling Station wow pynsakhiat ya ini.
“Hadien wa da chem wa i leh wa palat kawa ym yahap kam u kyrtong, neiliang u Presiding Officer da lai u chakhmat wow booh ya ka ujor,” ong u CEO.
U Kharkongor da pyntip u leh wa katkam ka yutip wa da yoh na u RO da ka leh palat da u kyrtong ka BJP ha katai ka Polling Station neibhah katkam ka aiñ ym chah wow klam næ leh kawon kawon hapoh ka 100 meter na ka thaw thap Vote.
“Ka ain ym khang ko ya uwon uwon u kyrtong wow klam wa kiwa thoh khubor, tangwa emkaam wow man ko jngai 100 meter na ka thaw wa thap Vote. I da e kti cha u Presiding Officer wow leh ya iwa emkaam hajrong ini i jia,” da ong u CEO.
Discussion about this post