Ka lehniam Behdieñkhlam toh kawi na ki lehniam wa kongsan tam ya ki khon ka Niamtre hapoh ka Raij Jowai, heiwa ha uni u snem kani ka lehniam u sdang ko nadooh ka 11 tarik kawa man ka Pynsiñ wei u pynkut ya ka ha ka 14 tarik ka Muchai.
Hajrong kiwi tawon ki bynta yong i step Pynsiñ, ha i sngi nawon ha jar jiar ki Kmaiyung daw pyndep ya ka Siang ka Pha wow e baam ya ki sangia wei wow pynboood won sa i wanrah ya ka Symbood Khnong da ki Khonraij ha Loomsooiung.
Ha i step ka Mulong daw pyndep ya ka Kñia Aitnar hei wow mih na Yung Langdoh ya ka wow pynlut da u Dolloi wei neini daw yachem won ha Myngkoi Pyrdi chwa wow lai thoh ya ki Dieñkhlam wow wanrah ya ki ha Iawmusiang katwa ki Khonraij won u lithooh ki ya ka Khnong Blai wow pynpoi ha Loomsooiung.
Ha i step ka Musiang ki Khonraij u lai rah ki ya ka Symbood Khnong wow pynyieñ ha Khliehchnong wei u pynbood won sa i yachem ki Kmai Raij ha Mynkoi Pyrdi chwa wow lithooh ya ki Dieñkhlam wow pynpoi cha jar jiar ki chnong wow pynyieñ ya ki wei ha Madan Sawiar ki Khon Raij u pynpoi ki ya ka Khnong Blai hapoh Sawiar wei u Dolloi u e u yei pyrnah ha u Kñi ka Kur Nikhla wow e ya i ngooh i dem i suit i choor ha ka Khnong Blai.
I step ka Muchai ka 14 tarik u sdang i nadooh i step da i Baam Tyngkong ha Yung Langdoh wa i Kyntiñ Khnong yeiwa daw pynbood won da i Choh Thyndai namo i Sympat Yung ha ki yung ki Kmai Raij. Ha i sngi nawon ki Khon Raij u tympat ki ya ka Symbood Khnong neitæ donhi wa ye ki Rot na ki Kmai Raij wow hiar cha Aitnar deiwa yohbor na u Dolloi.
Hadien wa e ya ka Khnong Blai daw pyndep won sa ya ka Datlawakor ha Madan Pohsawiar wa Madan Datlawakor.
