Ka National Investigation Agency (NIA) da pyntip ko wa hadien wa dep u kem ya 6 ngut ki bru wa emkti ha ki kaam wow khayi tooh ya ki bru iwa da leh ha ki thaaiñ khappood ka Assam, West Bengal wa Meghalaya deilang wa kiwi ki bynta ka ri ha ka 11-03-22, heiwa da lai kynreh ha kiwa boon ki thaw wa em ha Assam, Meghalaya waka Karnataka.
Wei kani ka takit toh yei pynpsiah tooh ya ki Rohingya/Bangladeshi Muslim, ki khynah kynthai kamjooh ki kynthai chapoh India yow pynman tre chnong ki yow chim kabu ki deiwa pynemkaam da ki kot ki sla wa chna tooh wei da pynngat ya kiwa chah kem hapoh ka Section 370 wa 370 (A) ka IPC.
Ha ka 4 tarik uni u bnai, ka NIA da Charge Sheet ko ya kini ki 6 ngut hapoh ka Section 120B, 370 (3) wa 370 (5) ka IPC.
Uwa yahkhmat ya ini toh uwa pyrtuid Ahmed Choudhury uwa tip leh kam u KK Ahmed Chaudhury wei da tip leh ya oo kam u Asiqul Ahmed uwa da leh yeini i kaam na Bengaluru deiwa em boon ki bru wa krehkaam lang wa oo ha kiwa boon ki bynta ka ri wei i chong tre u toh na Khelma, Cachar District Assam.
Kiwa de wa chah Charge Sheet toh u Ahiya Ahmed Chaudhry uwa na Cachar, Assam uwa da sah katni ha Bengaluru. Kiwi de toh u Sahalam Laskar uwa tip leh kam u Otiyar Ali Laskar uwa na Cachar, Assam, u Ahiya Ahmen Choudhury uwa na Cachar, Assam, u Bapan Ahmen Choudhury uwa na Cachar, u Jamaluddin Ahmed Choudhry uwa na Cachar Assam wa u Wanbiang Suting uwa na Donaskur, East Jaiñtia Hills, Meghalaya.
Ha ini i kynreh da ka NIA da yoh leh wow kem chiboon ki kot ki sla wa kiwi ki tiar ki tar wa man kam ki sabut wa leh kini ki bru ya ini i kaam. Kini ki bru da emkti ki wow pynbiang kari, thaw sah, ki kot ki sla wa da chna thok wa kiwi kiwi de yow pynsiah tooh ya ki Rohingya chapoh ka ri.
Ka takit dang lai ko chakhmat.
