Ynne i step ka 6 tarik, ka seiñ Khooid Ya Ka Wah Myntdu ha ka sien wa ar da lai li pait li sylli biang ko ya ka Wah Myntdu, iwa da sdang nadooh 8 waje i step hadooh 12 waje i sngi.
Ini i lai da sdang nadooh na yingkieñ Myntdu ter ter chadooh ka yingkieñ Tre Yong Riang.
Chirup wa kiwa yahkhmat ka seiñ, ki dkhot ka EC, ki para dkhot kamjooh ki bru samen kiwa em i chynna jngai ya ka pateiñ da ya wan ki ynne ka sngi.
Katkam wa da yoo ya i rukom man ka Wah Myntdu, ka seiñ diaw ko u chem ya i kheiñstiñ ki bor watoh u pait ya i khooid i jngiar, kamjooh ya i yirngam i yoosuk yong ka Wah Myntdu kawa man ka wah wa psa um ya ka chnong Jowai, ki warep wa chkeh wow pynpoi um cha hali.
Ha kani ka sngi, ka seiñ da pynman ko yei pynkhooid kam chibynta wow yada ya i tooid i kai ki jhep cha ka wah Myntdu.
Da chem ya chiboon kiwa pynsih ya ka um nadooh ki Plastic, ki Diaper, ki klong kiad, ki yusong baam, ki Sanitary Pad kamtæ ter ter iwa da pyndiaw ya ka seiñ hawa yoo yeini.
Heijooh i por pynpyrkhat ko ya uwi pa kawi wa yoh u yoo u sakhi ya i rukom man ka Wah Myntdu, kamtæ ka seiñ da kyntu ko ya waroh kiwa chong chnong, kiwa sait-that, kiwa wan uiñke, khamtam kyrpaad joor ya ki kattu katni ki bru ki wa jooh sñiaw ka’it u noh yaki jhep yong ki cha ki khloo ki kjam tangwa lait na i dwar pchem yong ki.
Ka seiñ booh ko ya i kyrpaad wa khian ha uwi pa kawi, wow sñiawbha u pynemkaam ki ya i bor pyrkhat yong ki hi neibynta ka mynried Wah Myntdu, kamjooh wow em i kitkhlieh samen samen.