Hadien wa kem ki pulit ka East Garo Hills ya ki ar ngut na Delhi wa kynthup ya u nong Nigeria uwa tip kam u Felix Jidefor (44 snem) wa kawi ka kynthai Naga kawa tip kam ka Khegholi Awomi (37) kiwa da emkti wow thok wow chukor ya uwi u bru na Williamnagar, EGH da T. 2 lak heiwa da wanrah ya ki cha Willamnagar yow takit chooh chooh ya ki.
Ya kini ki arngut da phah kset thanat ki 5 sngi yow ye ki pulit wow pteiñ yei takit wei da chem wa da em boon ki bru wa chah thok, chah chukor kiwa napoh ka jylla Meghalaya ha kini ki arngut.
Ki pulit da chem ki wa kini ki arngut da chim kabu ya ki bru kiwa na Jowai, Shillong, Tura, Baghmara (South Garo Hills), Williamnagar (East Garo Hills), Nongpoh, Nongstoin (West Khasi Hills) kiwa da chah thok ha ki jooh bait i rukom yow phah poisa deiwa kular ya ki da kiwa boon ki jait.
Da chem leh wa u nong Nigeria em u boon kiwi ki bru kiwa da ya krehlang wa oo.
Ki pulit da chem ki leh ya ki Facebook Account uni u bru wa e pyrtuid u Alex Williams wa Alex James yow thok wow chukor ya ki bru.
Uwi na ki WhatsApp Number wa pynemkaam u yow thok yow chukor ya ki bru toh u +447398279773.
Kamtæ ki pulit da kyntu ki ya ki paidbah wow husiar ya kini ki Facebook Account wa u WhatsApp Number wei ymtoh u chah chakæ ha kini ki jait kaam.
Lada em kiwa chah thok wow pyntip ki wut wut cha ki Police Station wa em chajan dooh.
Kam wow pynkynmoo wa na i yung u Felix da yoh wow kem 12 tylli ki Mobile, 23 tylli ki ATM wa 12 tylli ki Passbook yong ki Bank wa boon jait.
