Ka Meghalaya High Court da chem ko wa em 17 ngut ki baar ri wa chah kset ha Shillong District Jail hanlada pyndep ki yei por, kini kynthup ki ya uwa na Myanmar uwa da chah kset palat 10 snem.
Ini i chem toh hadien wa lai pait ka Division Bench ka Chief Justice, ka Revati Mohite Dere wa u Justice W. Diengdoh ya ka Jail ha ka 9 tarik uni u bnai wei ya ini da leh hadien wa ong ka sorkar wa em du uwa u Bangladeshi wa chah kset wei da neh u la chi snem nadooh wa kut i por u.
Ka High Court da chem ko ya ki 17 ngut ki baar ri wa kynthup 15 ngut na Bangladesh, uwi na Myanmar wa uwi na Nigeria kiwa da pyndep yei por yong ki heiwa uwi na ki Bangladeshi da chah kset u palat 4 snem nadooh wa kut i por u katwa kiwi da chah kset ki 6 bnai wa hadooh kattu katni snem.
Ka miej bichaar da ong ko wa ka yukheiñ wa e ka sorkar toh kawa yahbakla wei kawa ym tne.
Da chem wa em 4 ngut ha Williamnagar Jail, 3 ngut ha Tura Jail wa 4 ngut ha Nongpoh Jail kiwa da pyndep yei por wei ympu tip neiwon i tre ri ki.
Ha ini i lai pait da emlang u Inspector General of Prisons uwa da pyntip wa ka Meghalaya ym em ko ya ki thaw wow booh ya ki baar ri kiwa da kut i por wow chah kset katwa dang yang wow phah pynuiñ ya ki.
Ka High Court da ong ko wa i kset ya ki bru palat yei por man iwa tyngkheiñ ya ka Article 21 ka Constitution wei ka Supreme Court leh boonsien da ong ko wa ymye u kset palat yei por.
Chooh chooh ka miej bichaar da ong ko wa ya ki baar ri wa da kut i por toh u kyrriah cha ki thaw kset namo ki Detention Centre deiwa hukum ya ka Home and Prisons Department, u Inspector General of Prisons wa u sahep ka Foreigners Registration Office, Shillong wow wan hajir ha ka High Court.
Da kylli leh katwon u smat ka sorkar wow booh ya ka Detention Centre neibhah ymye wow kset ya ki bru palat yei por wa da booh.
Discussion about this post