Lyngba ka RTI, ka Hynniewtrep Integrated Territorial Organisation (HITO)-Jowai Circle da chem ko kamwa 560 tylli ki kreh namo ki Sanctioned Post (Regular Post) wa lait thylli du hapoh West Jaiñtia Hills.
Kini ki Post kynthup lang ki ya kiwa na DSC (481 Post) wa ka MPSC (79 Post) ha ki Department waphær waphær wa em hapoh West Jaiñtia Hills District waroh kawi.
Neiliang ka seiñ da pyntip ko yeini ha u Chief Minister uwa ksoh leh ya ka Finance kamjooh leh cha u Chief Secrectary ka jylla, heijooh i por cha u MLA ka Jowai Constituency.
Ka seiñ da kyntu joor ko ya u DC wow pyndap ya kini ki kreh kamjooh leh yow bood ya ki kyndon aiñ ka DSC.
Ha ka dorkhat ka seiñ, da dawa ko wa ki Result u pynchong na ka Merit List, heijooh i por wow pynbiang da ki Video Camera ha ka Personal Interview.
Da dawa leh wow e da ki Answer Key, wei ka seiñ da sñiawsih ko u yoo katni ka bhah yoh kreh kiwa duna hei doh i pran ym em de ko.
Ka seiñ da maham joor ko ya i lehbor ki kattu katni kiwa em hei bor, deiwa kyntu ya ki khynroo khyllood kiwa daw chimbynta ha kiwon kiwon ki Exam kamjooh leh ya ki manbei manpa hapoh ka West Jaiñtia kiwa em i kitkhlieh wow mih chakhmat wow yakhun pyrchah ya i baam-tooh khnang wa ki khynnah u yoh ki yei hok yong ki.
Discussion about this post