Ka seiñ Hynniewtrep Youth Development Council (HYDC) East Jaiñtia Hills District da pynkrehkaam ko ya ka Phase 3 yow dawa su ya ka nong sngi katkam ki kyndon aiñ ka Minimum Wage, kamtæ da hiar cha ki Dhaba wa ki Petrol Pump ka thaaiñ Ladrymbai yow pait yei pynkrehkaam ya ka Minimum Wage katkam ka aiñ wei wow pynku leh ya ka bai mylla yow lait u chah yooh beiñ ha ki malik wa pynkreh ki. Ka Phase 1 wa Phase 2 toh kawa dadep leh ha East khasi Hills.
Ha ini i lai pait ka seiñ da chem ko wa boon ki tre Petrol Pump, ki karkhana, ki Dhaba wa Restaurant ym em da bood ki wow su nong katkam ka Minimum Wage wa da booh da ka sorkar Meghalaya.
Da chem wa kiwa kreh Petrol Pump da yoh ki du kamwa Rs. 200 chi sngi iwa duna yeiwa da booh wei pynyoo ko leh wym ye ka sorkar Meghalaya wow pynkrehkaam ya ka aiñ kawa da kdaw che yei nong sngi hapoh East Jaiñtia Hills District.
Ka seiñ da ong ko wa katkam Minimum Wage ka bai mylla ya kiwa man kam ki Unskilled Labourer toh ₹525 chi sngi iwa mut ₹13,650 chi bnai, ya ki Semi-Skilled Labourer won ₹565 chi sngi næ ₹14,690 chi bnai, ya ki Skilled Labourer won ₹605 chi sngi næ ₹15,730 chi bnai katwa ya ki Highly Skilled Labourer won ₹645 chi sngi næ ₹16,770 chi bnai.
Hajrong ini, ka seiñ da kylli ko na ka sorkar lada em ko yei kitkhlieh neibynta kiwa dooh wa duk deiwa pynyoh yei hok ki katkam ka aiñ.
Discussion about this post