Hadien wa hiar slap ha kini ki ar sngi wa dadep, da yoo wa i kreh ya u sarok na Sonapur cha wah Prang hadooh Hingaria da em ki thaw wym biang ha ki bynta ka chnong Lejri, neibhah du ar sngi i hiar slap da yoo wa em ki bynta yong uni u sarok wa da sih da pra wei ki dooid (Side Drain) leh da dap khyndaw dap moo ki hadooh wa ka um da kai ko najrong sarok.
Ka KSU Lejri Unit hei lai pait ynne ka sngi da chem wa em ki bynta yong uni u sarok wa da sih da pra neidaw wym miat ki dooid ha ki bynta uni u sarok wei da chem leh ya uwi u khynroo uwa da pynkhooid ya u dooid deiwa sai dei kti ya ki moo wa khyndaw.
Hawa kylli na oo da ong u wa da leh u yeini hadien wa yoo u yei kai ka um cha u sarok wa dang dep pynchna wei ymtoh wa da wan khnang u wow leh yeini neibhah oo lai u chei thaw kreh u tangwa deiwa em i sñiawkhia yeini da yaleh u wow pynkhooid ya u dooid wa em ha rood sarok wa dang chna thymme uwa man leh u sarok psiang wa nyngkong kani ka thaaiñ uwa da man kam i kyrkhu, kamtæ da chimkhia u wow pynkhooid ya uni u dooid.
Ka seiñ kyngba kani ka kyrwoh da phah ko ya ka khubor cha ka sorkar wei khamtam ya u Contractor wow sñiawbha u kreh rap bha khamtam wow pynkhooid ya kini ki dooid kiwa da dap khyndaw ha tymbud sarok wei wow pyntikna wa i pynchna ya uni u sarok leh man i iwa biang wa miat yow man i i kyrkhu ya kiwa sah cha kani ka thaaiñ khappood waroh kawi neibhah wa man ko ka sien wa nyngkong wa yoh sarok psiang ki na ka sorkar hadien ki phaw phaw snem.
Discussion about this post