Jowai: Ka Jaiñtia Students Union, ynne i miet hadien wa yoh yutip ko iwa tikna, hapoh i yahkhmat u President, u Lawyerson War wa u Vice President, u Emperor Bareh chirup wa ki pulit da lai kynreh ki ya ka Iawmusiang Shopping Complex, Jowai kawa da sah i kreh kattu da boon snem.
Neiliang u Lawyerson da ong u wa hadien wa yoh yutip ka seiñ wa tikna wa em ki baar jylla wa sah ha kani ka yung da lai sylli ya ka dei miet heiwa da chem sakhiat wa em ki baar jylla ha kani ka thaw.
Hapoh kini ki kamra wa da kær da em ki palong, ki kchu ki siang wa ki tiar pynemkaam wa man ka sngi.
Ha kani ka thaw da chem ya le ngut ki baar jylla kiwa sah wei manda takit ya ki da ong ki wa ya ki da phah sah da u Contractor wow yang ya ki tiar wa booh ha kani ka thaw khamtam ki naar rod, ki pyrthaap wa kiwi kiwi.
Kini ki baar jylla hawa yaklam wa ki da ong ki wa ya kini ki tiar da kit cha Shillong manda emkaam neibhah ha Shillong leh em i kreh yong u Contractor.
Kini ki baar jylla kiwa na Assam da pynyoo ki ya ki kot ki sla yong ki wa kynthup ya ka EPIC, ki NRC, wa kiwi kiwi tangwa ym em won ki ya ka Labor Licence.
U Lawyerson da ong u wa hanpaya kani ka yaw katni da man ko du kam ka thaw sah donhi ki dkhar heithaw wa toh hok u yoh ki khon ka ri-loom Jaiñtia u im ja kpoh na ka. Ieh kani ka yaaw da man ko du kam ka thaw booh tiar donhi ki Contractor mo, ileh ki MDC wa ka JHADC ymbien ki u booddien ya i kreh ya kani ka thaw hadooh katni?
“Hawa pait ya i thaw sah kini ki bru pynartatien ko ya i wow sah ha ka du le ngut donhi neibhah i man i long yong ki kamra pynyoo wa em ki por boon ngut kiwa sah ha ka,” da ong u Lawyerson.
Chooh chooh da beiñ joor u ya ka Council deiwa ong, kani ka thaw toh kawa u pait ka JHADC tangwa kini ki baar jylla tang ya ka Labour License leh ym em ki. Neiliang ka seiñ da e por ko ya kini ki baar jylla wo pynbiang ki ya ki Labour License yong ki hapoh chi tayaw.
Heiyatoh wa i sah yang tiar da ki baar jylla, ka seiñ da e buit ko ya u Contractor wow thung noh da ki bru napoh ri-loom Jaiñtia khamtam ha kini ki por wa duna ki khih ki kreh.
Katkam wa man katni ki baar jylla wa wan psiah chapoh jylla dang joor ki hadien wa pynbna ya ka thup NRC heiwa hadooh 19 lak tam kiwa ym em u mih pyrtuid ha ka, wei ki bor District wa ki pulit kyntu ki ya ki chnong wa ki seiñ wow yakrehlang wa ki heiyatoh wa i kynreh ya ki kot ki sla ki baar jylla.
Discussion about this post