Heiyatoh wa i em i tympdung Bomb IED, neiliang u SP ka East Jaiñtia Hills da pyntip u wa da yoh FIR ha ka 16 tarik uni u bnai wa ini pdung toh iwa da jia ha ka Dhar Construction Company Campus wa em hajan ka chnong Shymplong ha ka 15 tarik heipor kamwa 12:15 i step synyaaw.
Hawa hiar lai takit da chem wa em hi i pynemkaam ya ki IED (Improvised Explosive Device) wei i pdung da ktah ko ya kawi ka Truck kit um tangwa ym em wa mynsoo wei ya ka Case da Register ha Lumshnong Police Station hapoh ki kyndon 109(1)/113(1)/113(2)/113(3)/326(f)/327(2) ka BNS deilang ka Section 3 ka aiñ Explosive Substances Act.
Heiyatoh wa ini da kem ya ar ngut ki bru kitæ u Richard Suchen (31 snem) wa u Pynshaitbor Syih (45 snem) kiwa waroh ar kiwa chong chnong ka Shymplong kiwa emkti heini i tympdung IED.
Hadien wa pynman yei takit da chem wa em sa uwi uwa na chnong Shymplong hi uwa tip kam u Smiki Tongper uwa pynkhreh wei lai tympdung ya uni u Bomb IED deiwa ya krehlang u Richard, u Pynshaitbor wa sa uwi u wym pu tipmit uwa man kam u dkhot ka HNLC.
U Smiki toh u wym pu em yoh u kem tangwa uwa da em Case u hapoh ka Khliehriat Woman PS deiwa chah pynngat hapoh ka kyndon 376(3) ka IPC deilang ka Section 3(a)/4 ka aiñ POCSO Act.
Hawa lai kynreh ki pulit yei yung u Smiki da chem ya le Roll ki Safety Fuse wa ar tylli ki Safety Fuse wa khian, le tylli ki Detonator, 6 tylli ki Detonator Cap wa man thylli, da chem leh ya u Gun Powder, 82 tylli ki tiar wa da ah lyngkhot lyngkhai, kawi ka Rifle wa da chna hi, ar tylli ki Handset Walkie-Talkie wa san tylli ki Fuse.
Neiliang ki pulit da kyntu ki ya ki paidbah wa lada tip ki ya kiwon kiwon kiwa emkti ha kini ki kaam pyrchah aiñ wow wan ki chakhmat yow pyntip ki wei daw murieh yei pyrtuid ki.
Discussion about this post