U Chief Executive Member ka Khasi Hills Autonomous District Council, u Titosstarwell Chyne da pyntip u wa da chem u yei soi ya ka soskular hapyrdi ka MeECL wa ka District Council neibynta ka Umiam Hydro Power Project.
U CEM da pyntip ya ini hawa jubab yeiwa kylli wa da wanrah da u MDC ka Mawhati, u Charles Marngar ha ka dorbar lyiur ynne ka sngi. Katkam wa pyntip u CEM, neiwa lum ya ki kot ki sla da chem wa i soi ya ka soskular toh wa nadooh ka 4 tarik u Naisaphra u snem 1971, ha i por wa ka MeSEB kawa tip katni kam ka MeECL, wa toh ka Assam State Electricity Board kawa da soi ya ka soskular wa ka United Khasi Jaintia Autonomous District Council, wei nadooh itai i por ym pu em de i pynthymme ya katai ka soskular.
U CEM da pyntip u wa hadien wa chem ya kani ka soskular, da chna u ya kawi ka Committee yow puræ bniah hajrong ini i bynta wow phah won da i thoh cha ka sorkar jylla yow pynsñiaw yei emkaam wow pynthymme ya katai ka soskular hapyrdi ka KHADC wa ka MeECL.
U Titos da ong u wa manda lai bait i krehkaam, ka Committee daw chong biang ko wow pyntip cha ka sorkar wa toh u burom wei wow pynthymme ya katai ka soskular, wei kamjooh wow phah cha waroh ki MDC yow e yumut ki.
