Ka jait dakha wa thymme da chem ka na ka wah khian wa tip kam ka wah Pyrngang wa em ha ka chnong Lakroh, West Jaiñtia Hills District wei da e pyrtuid ka kam ka Oreichthys Warjaintia kam chibynta wow pynsahnaam ya ki War Jaiñtia wa em ha kani ka thaaiñ.
Ya kani ka dakha da chem da u Lekiningroy Dann uwa chong chnong ka Nongjngi uwa lai puræ PhD ha ka Kerala University of Fisheries and Ocean Studies (KUFOS), Kochi hapoh i yahluti u Rajeev Raghavan kam u Supervisor deiwa emlang u Neelesh Dhanukar kam uwa ya krehlang namo u Collaborator.
Kani ka dakha da tip pyrtuid ka da ki tre chnong kam ka Puthi wei ym em pyrtuid ko ha ki kot ki sla kam kawi na ki jait dakha wa em ha pyrthai wei haap ko hapoh ki dakha wa tip kam ki Oreichthys (Genus) wei jooh em ki 7 tylli ki jait (Species) wei deiwa chem ya kani kawa thymme kattu da em ki 8 tylli ki jait.
U Lekiningroy Dann kam chibynta i yaleh PhD u, da lai u cha kylleiñ ka thaaiñ Northeast yow chim pyrtuid ya ki jait dakha wei ya kani ka dakha wa chem u kattæ toh ha ka Survey wa leh ha ka 17-05-24 wei hadien wa puræ bniah ya kani ka dakha da chem toh ka jait thymme wei da pynbna leh yeini hapoh ka Journal of Fish Biology.
Ka wah Pyrngang toh kawa sdang na ki loom ka chnong Amlanai wei kai ko cha Bangladesh deiwa yachem wa ka wah Boro Gang.
U Lekiningroy da ong u wa ka Meghalaya man ko kawi na ki jylla wa dang duna bha kiwa tooh bniah yow chim yukheiñ ya ki dakha wa em ha ki wah yong ka wei emkaam bha leh wow yada ya ki.
Ka wah Pyrngang man ko leh kawa khooid wa jngiar wei kawa mahajon bha ha ki jiat wa im ha ka kawa yarap leh wow pyndap yeiwa emkaam kiwa chong chnong.
U Lekiningroy Dann toh uwa jooh lai skur Nursery ha Nongjngi Khliehshnong Mission School, ka Class I hadooh Class IV ha Nongjngi Khliehshnong Government L.P. School, Class V hadooh Class X (SSLC) ha Government Boys’ Higher Secondary School, Jowai neitæ ya ka Class XI wa Class XII (HSSLC) ha KJP Synod Mihngi Higher Secondary School, Jowai.
Ya ka Graduation yong ka Bachelor of Fisheries Science (B.F.Sc) da pyndep u na College of Fisheries, CAU (I), Lembucherra, Tripura katwa ya ka Post Graduation na Master of Fisheries Science (M.F.Sc) Under Department of Fisheries Resource Management (FRM), College of Fisheries, CAU (I) Lembucherra, Tripura.
Ya ka PhD wa dang leh u kattæ toh na Kerala University of Fisheries and Ocean Studies (KUFOS), Panangad, Kochi, Kerala hapoh i yahluti u Dr. Rajeev Raghavan.
Discussion about this post