Jowai : Hadien wa ka FKJGP Bataw Unit da chemdien ko lyngba ka RTI wymbiang i rukom kreh ya ka scheme paikhana ya ki manyung wadooh ha ka chnong Bataw, East Jaiñtia Hills, ynne ka sngi ki wakreh ka tnat PHE kiwa kynthup ya u Block Coordinator da hiar wow takit ki cha kani ka chnong wow chemdien yeini.
Ha katai ka chnong, em ki paidbah kiwa da yoh ya ki kattu katni ki tiar ki tar neibynta wow chna paikhana wei boon kiwi won ki wym yoh iwa da pynlyngngoh ya ki paidbah.
Katkam ka RTI kawa da yoh da ka FKJGP Bataw Unit, da chem wa ka Village Water Sanitation Committee, Bataw hapoh i yahkhmat u Ombormi Tariang kam u Secretary wa u J.R. Rupsy kam u Chairman da chem wa em i bakla ya ka poisa kawa da sai khlem yohbor.
Ka RTI da pynyoo che ko wa dadep sai ya ka poisa kawa hadooh T. 20.96 lak wei katai ka poisa da chem wa da dep thied yaki kattu katni ki tiar neibynta wow pynkreh ya ki paikhana cha ka manyung wadooh weiwa dang boon ki manyung kiwa mih pyrtuid tangwa ympu yoh ki ya kitai ki tiar kiwa chongdor hadooh T. 8000/- kawi ka manyung.
Ynne ka sngi hei takit u Block Coordinator, da chem leh wa kawi ka manyung da yoh bynta ko hadooh soo sien. Neiliang u Block Coordinator da ong wa daw phah u ya ka report cha u Executive Engineer ka PHE wow bichaar ya ka report.
Neiliang kiwa mihkhmat ka FKJGP Bataw Unit kiwa kynthup ya u Deihok Sumer wa da synran da u General Secretary ka Jaiñtia Hills Unit, u Ricky Shylla da pynsñiaw ki yei khuslai hei rukom thut i pynkreh ya kani ka scheme.
“Ki paidbah toh u yoh hok ki, wei kyntu i ya ka tnad PHE wow chimkhia ko heiyatoh weini neibynta u paidbah”, da ong u Ricky Shylla.
Discussion about this post