Hadien wa ha ka 16 tarik uni u bnai ki pulit ka East Jaiñtia Hills da yoh ki wow kem ya ar ngut ki kynthai kitæ ka Hohoi Lhanghal waka Ling Haokip kiwa wan na Silchar deiwa rah lang yei drugs Heroin heiwa ya kini da yoh wow kem ki na Nongsning ha ka thaw pynsangeh kari wa em ha BMS Petrol Pump heipor wa wan ki da ka kari kamai Sumo wa em ya u Number MZ-04A-2996 heipor kamwa 5:00 waje i step wei i Heroin wa da yoh kem na kini ki arngut toh iwa khia 197.35 grams.
Hadien wa takit ya kini da phla ki yei pyrtuid ka bru wa toh u chimkti ya ini i drugs, kamtæ ha kani ka jooh ka sngi ki pulit da lai ki cha Shillong heiwa da kem ya ka Ngai Rami (28 snem) kawa khut siñ Nano kawa toh u chimkti ya ini i drugs ha Shillong wei ya kani da kem na i thaw sah wai ko wa em ha Nongmensong Shillong deiwa yarap ki pulit ANTF ka East Khasi Hills wa ki pulit ka Nongmensong Out Post.
Ka Ngai Rami toh kawa na chnong Thangzau Road Hill Town, Churanchandpur, Manipur.
Hadien wa takit ya ka Ngai Rami da phla ko wa em ar ngut kiwa khayi drugs kiwa na Manipur kiwa em ha Shillong, kamtæ ha ka 18 tarik uni u bnai ki pulit ka Khliehriat da lai ki cha Shillong wei deiwa yarap ki ANTF ka East Khasi Hills wa ki pulit ka Rynjah Police Station da lai kem ki ya u Khailen Haokip (42 snem) waka Lheineihoi Haokip (40 snem) kiwa chi kurim wei kiwa na New Boljang Churachanpur, Manipur kiwa sah ha Rynjah, Shillong wei da wanrah ya kini waroh le cha ka Khliehriat Police Station yow leh yeiwa emkaam katkam ka aiñ.
Puræ leh: Yoh kem ki pulit ka East Jaiñtia ya arngut ki kynthai wa khayi Drugs
Discussion about this post