Ka seiñ FKJGP-East Jaiñtia Hills District da e por ko chi bnai ya ka National Highways Authority of India (NHAI) wow pynchna ya u sarok NH-06 ha ki bynta ka Lumshnong cha Malidor uwa da sih cha palatpood hadooh wym em psiang de wei da em sa du ki thlu wa heh donhi.
Ka seiñ da lai e ko ya ka dorkhat lyngba u Manager ka Toll Plaza wa em ha Lumshnong heiwa da thoh wa uni u sarok da man u uwa maa wow pynemkaam katwa ya ka dan wa da chim man-ka-sngi khlem pep.
Chooh chooh da ong wa ya uni u sarok da ieh da slem khlem da pynchna de wei heipor slap da man u uwa dap um wei uwa satliang wei da em ki thaw wa oor khyndaw, oor moo iwa da pyntieñ ya kiwa lai wa wan hadooh wa ye u dooh yei mynsien.
Kamtæ da ong wa ini da wanrah ko yei chah ktah yei kit ya ki mar ki mata, ki Ambulance wei da wanrah leh yei ya tyrrah kari neipor cheipor.
