theme-sticky-logo-alt
theme-logo-alt
Advertisement ad1

Da pynman yei pynsñiawthooh wei pynpsiah pyrtuid hapoh ka e-Shram

Ka yung krehkaam yong ka District Labour Office Jowai chirup i yakrehlang wa ka Common Service Centre, West Jaiñtia Hills District waka All Jaiñtia Muster Roll Workers & Labour Union Jowai Unit, ynne ka sngi da pynman ki yei pynsñiawthooh paidbah hajrong ka e-Shram ha pchem ka yung krehkaam yong ka Dorbar Chnong Tympang Iawmusiang, Jowai.

Ka B. Toi, Labour Inspector hawa pynche hajrong ka e-Shram ong ko, waroh ki wakreh mylla næ ki wym yoh yei kamai kajih wa biang (Unorganized Worker) wa kynthup nadooh ki wakreh mistri, ki wakreh Muster Roll, ki warep, kiwa psan mrad, ki wakreh Mid Day Meal wa kiwi ye ki u pynpsiah pyrtuid ya ki hi khnang wow yoh ki laad yarap neibhah lyngba kani ka e-Shram ka sorkar e ko ki laad yarap waphær waphær.

“I pynpsiah pyrtuid u e myntoi ko rap bha ya ki paidbah neibhah ka thong yong ka sorkar India wa neini chakhmat waroh ki Scheme wa wan naka sorkar pyrdi u lai bait ko lyngba ka e-Shram,” ong ka B. Toi.

Ki bru wa da thap pyrtuid namo wow Register wym emkaam de ki u khuslai lada em ki heiwon heiwon i thaw neibhah da ye ki wow yaleh Online ya iwon iwon i myntoi, khlem da emkaam de u lai cha kiwa yahkhmat ka chnong ka thaw næ kiwa mihkhmat. 

Kamtæ kyntu ko yaki paidbah wa emkaam u yoh yarap naka sorkar wow sñiawbha ki u wan chakhmat khlem i artatien khnang wa ka jylla u lait ko nei sahdien. 

U M. Myrchiang, District Manager CSC West Jaiñtia Hills kyntu u yaki paidbah wow lai pynpsiah pyrtuid ha ki Common Service Centre wa em ha ki chnong ki thaw næ ki thaw wa jan tam khlem i su, tangwa emkam u rah Aadhaar Card, Bank Passbook wa u Phone Number wei wow Register ki heipor wa chondur Aadhaar. 

Neiliang u Adviser ka All Jaiñtia Muster Roll Workers & Labour Union Jowai Unit, u K.L. Pariat hawa klam ong u, ka sorkar India da pynbna ko ha u Naisaphra 2021 wa waroh kiwa kamai kiwa yoh hapoh T. 15,000 chi bnai ye ki wow Register hapoh kani ka e-Shram.

Ki myntoi wa ye u yoh kynthup lada jia tyngkhooh iwon iwon i mynsoo hadooh wym ye de u li khih li khan, ka sorkar daw yarap ko T. 1 lak, wei lada jia wa yap won nei mynsoo i yarap u man ko T. 2 lak.

Najrong kini, ong u ye u man wa ka sorkar daw pynmih ko kiwi tawon ki laad yarap lyngba ka e-Shram, kamtæ kyntu u wow chim kabu khnang yow chngaaiñ i manbru neibhah wym ye u tip yi wow jia chaphrang.  

Share this:
Previous

Chi bnai e por ka FKJGP wow pynchna ya u sarok Lumshnong-Malidor

Next

I sñiawngooh na kiwa hayung u (T) Nunu Shylla