Jowai: Ya ka Girls Hostel namo ka thaw sah ki khynnah kynthai yong ka Kiang Nangbah Government College, Jowai hadooh ynne ympu ye u wai ya ka hanlada dep wow chna ya kani ka yung khyndaw-bilat (Building) nadooh u 2015, wei da ieh hi-eh ya ka khlem wai namo pynemkaam ya ka.
Kam wow pynkynmoo heini wa ki khynnah ka College hapoh ka lama KNGC-SU dang ha kini ki kajiak sngi da yakhih ki neibynta wow wai noh ya kani ka Hostel wa kiwi ki mat dawa ka College, tangwa neiliang ka sorkar ym em leh ko iwon iwon leh hajrong ini.
Neiliang ka JSU-CB, hapoh i yahkhmat u President yong ka, u Lawyerson War, da thmu ki wow yoh yutip na u Principal ka College tangwa ym em yoh ki wow yachem wa oo wei da yaklam ki du wa ka Jerina Lamare, President KNGC-SU, kawa da ong wa ymye wow tip che wa neiyi i daw wa ka sorkar chimpor ko hadooh katni wow wai ya kani ka Hostel hanlada dep wow chna nadong chadong, da ong ko leh wa wot ka kamra ki khynnah chynrang (Boys Hostel) leh ymem de pdiang namo e form ya ki khynnah neidaw wa kani ka thaw emkaam ko yei wow chna pynmiat ya ka.
Neiliang u President ka seiñ da kyntu joor u ya ka sorkar wa ki bor wa pait ya kani ka thaw sah ki khynnah kani ka thaw puræ wow pynkrehkaam noh ya ka Girls Hostel wei wow pyndep smat noh ya ka Boy Hostel khnang wa ki khynnah wa wan na kiwi ki chnong khamtam kiwa dooh wa duk u yoh myntoi noh ki deiwa sah ha kini ki thaw.
Neiliang ka seiñ da e por ko chi bnai ya ka sorkar wow wai noh ya kani ka Hostel wei wow pynkrehkaam biang ya ka Boys Hostel wei lym kamtæ ka seiñ daw pynman ko dei yakhih wa khor.
Discussion about this post