Kiwa chong chnong ka Lapangap da chem chitom ki hadooh katni heiwa ynnin ka sngi da chah hiar thma biang ki ha ki Karbi kiwa siat ya ki da ki watur na chiliang loom ha Pynthor Umchyrngan heiwa ki paidbah ka Lapangap leh da pynuiñ ki deiwa siat ya ki watur.
Ini i yakhun da neh i kamwa chi kynta wei da sangeh hadien wa ki pulit ka Meghalaya wa Assam da beh ki ya ki paidbah wow liwan noh ki.
Kam wow kdaw heini wa kattu da em la chi bnai tam wa ki paidbah ka Lapangap ym em yoh ki wow lai pait ya u kba ha pynthor Umchyrngan wa kiwi ki pynthor wa dadep thung kba ki nei pyndik ki Karbi hanla em ka ktem ki pulit Assam pyn ha u loom ka chnong Lapangap.
Neiliang u Waheh Chnong ka Lapangap, u Deimonmi Lyngdoh pyntip u wa ini da jia i la ar le sngi heiwa ki Karbi da pynthut ki ya ki khynnah wa lai sum kamjooh ya ki warep hawa thmu ki wow lai pait ki ya u kba wa ka um ha ki hali ki pynthor.
Da ong u leh wa i em ki pulit Assam hapoh u pood ka Dorbar Chnong Lapangap da pynthut joor i ya ki paidbah wa chong chnong khamtam ki warep.
Ka Dorbar Chnong Lapangap da dawa ko na ka sorkar wow kyrriah ya ki pulit Assam wa booh ktem hapoh u pood ka Lapangap wei wow wanrah noh da ki CRPF wow yada ya ki paidbah nei chah pyndik.
Discussion about this post