U heh pulit wa da chah beh kreh (Suspended) hadien wa da chah kem hajrong i pynbaad baamtooh, u Gabriel K Ïangrai uwa da yoh mih noh na patok deiwa yoh jamin ynne ka sngi ka 14 tarik, tangwa mar ya mih na Shillong District Jail, ki pulit na ka chnat CID da yang chwa ki ya oo wei da kit ya oo ha kawi ka kari sorkar (Bolero) hajrong kawi won ka kaam yow takit wa da chah pynbaad u.
Hadien wa da yoh mih na patok, u Ïangrai da yaklam u leh wa kiwa thoh khubor heiwa da pynbaad u wa i chah kem yong oo toh neidaw wa da ya sooh buit ki pulit ‘High Level’ wa kattu katni ngut ki heh spah.
Mar ya dep wow klam wa kiwa thoh khubor, ki pulit CID kiwa da yang chwa ha khyrdop da yah noh ki ya oo wow takit sa ya kawi won ka Case wa da e pyrchah ya oo.
Ha i por wa chah kit noh ha ki CID, da ong u wa ya ki Case wa da ujor pyrchah ya oo leh da murieh lut, tangwa da yoh yutip u kiyi kitæ ki Case du hadien wa leh u da ka RTI, wei neiliang u Gabriel da pynsñiaw u leh wa smat u wow ya krehlang heiyatoh wa kani ka takit.
Chwa wow chah rah ha ki CID da ong u wa oo em u ki wym pu kwah u wow ong neibha tieñ u ya chah pynkut i mynsien u tangwa lada yap u, daw taan lang u leh ya kiwi neibhah oo toh u bru wa kreh chitom wei kawon kawon ka poisa wa em u toh deiwa kreh hok wei kiwon kiwon ki thaw wa thied u leh toh hei pyrtuid yong oo ym em murieh u kam kiwi.
Da ong u leh wa kitu kiwa wan chakhmat wow e sabut pyrchah ya oo toh kiwa dei chah pynbor dei chah maham neibhah ki kaam wa yatoh wa ki sarokbah (Highway) toh ki thaw chna poisa wei iwa jia ya oo toh na ini i daw.
U Ïangrai da chah kem u ha ka 02-11-22 hajrong i pynbaad wa emkti u ha ki kaam baamtooh hawa yatoh wa i pynkrehkaam ya ka National Emergency Response System (NERS), ha Sadar Police Station.
Kam wow pynkynmoo wa ka chnat pulit da thung ko leh ya ki bru wow takit wa da khlieh da u Inspector General (Law and Order), u Mukesh Kumar Singh hawa yatoh wa i thied ya 29 tylli ki kari yong ka chnat pulit ha i por wa u Ïangrai dang ksoh u kam u Assistant Inspector-General of Police (Administration).
