Ha i jia wa nyngkong hapoh ka ri, ka yung bichaar ka West Bengal ha ka 18 tarik uni u bnai da phah kset ko chi rta ya ki 9 ngut ki bru wa da chah kem wei chah bichaar kiwa thok chukor bru deiwa maham u kem kawa da tip katni kam ka Digital Arrest Cyber Fraud. Yei rai pynrem ya kini ki 9 ngut da e da ka Kalyani Court wa em ha Nadia District iwa da man kattu kam ka nongmuna ya kiwi kiwa chah pynngat ha kam kini ki jait kaam wa tip leh kam ki Cyber Crime.
Yei bichaar ya kini da chimpor 8 bnai wei kini ki 9 ngut toh u Md Imtiyaz Ansari, u Shahid Ali Shaikh, u Shahrukh Rafik Shaikh, u Jatin Anup Ladwal, u Rohit Singh, u Rupesh Yadav, u Sahil Singh, ka Pathan Sumaiya Banu wa u Faldu Ashoke. Kini toh kiwa soo ngut na Maharashtra, le ngut na Haryana wa ar ngut na Gujarat kiwa man leh kiwa nyngkong dooh wa chah rai pynrem da ka yung bichaar ha ini i jait kaam.
Kini ki 9 ngut toh kiwa da thok chukor ya u Partha Kumar Mukerjee uwa man kam u Scientist uwa da chong ngiah, heiwa da chah thok u ha kini ki bru hadooh Rs. 1 klur ha u October 2024.
U Mukerjee nyngkong da em wa Phone Video Call oo ha u WhatsApp da uwi u bru wa kam toh u heh pulit na Mumbai heiwa da pynbaad ya oo wa da leh u ya chiboon ki kaam pyrchah aiñ kiwa yatoh wa ka poisa poilaiñ heiwa da pyntieñ ya oo deiwa maham kem wei da phah su poisa oo boonsien bha cha kiwa boon ki Bank Account.
Hawa takit ki pulit hadien wa yoh ujor ha ka 06-11-24 da chem wa kini ki Phone Call da wan ki na ri Cambodia tangwa da pynemkaam da ka Indian SIM Card wei kini ki bru da leh ki yeini i kaam wow pyntieñ wei thok poisa ya kiwa boon ki bru hapoh ka jylla.
Waroh kiwa da chah kem da em ki 13 ngut kiwa na Maharashtra, Haryana, Gujarat wa Rajasthan tangwa da Charge Sheet ya 9 ngut hapoh ki kyndon ka Bharatiya Nyaya Sanhita (BNS) wa ka aiñ Information Technology (IT) Act.
Discussion about this post