U bru wa em 39 snem i rta uwa na India da phah kset ya oo waroh chi rta hadien wa pynyap u pyn ya ka bei u ha yung wa sah u ha Birmingham, UK. Uni u bru wa tip kam u Surjit Singh da phla u wa pynyap u ya ka bei u kawa tip kam ka Mohinder Kaur kawa em 76 snem i rta iwa da jia ha u Naikhynde u snem wa dep wei daw hap chong patok u ym duna 15 snem chwa wow ap biang yei long i man u.
Yei rai phah kset da pynmih ha ka 12 tarik uni u bnai da ka Birmingham Crown Court.
Katkam wa chem i bichaar, u Singh da dat u ya ka bei u hadien wa yamai ki heiyatoh wa u Remote Control ka TV wei heini i por wa jia da muaid u wei pynemkaam u leh yei Cocaine iwa da pyntikna hadien wa leh ya ka Blood Test.
U Singh uwa sahlang wa ka bei u yow pait ka, da ong u wa da chrai u hadien wa mai ko oo neidaw wa da muaid u.
Katkam wa khana u Singh hapoh ka yung bichaar, da kynjat u ka ka bei u boonsien wei hadien wa leh u yeini da pyntip u ya kiwa emyatoh u chwa wow yut u nei yung wa sah u ha Clarence Road ka Birmingham iwa em ha ka thaaiñ Soho.
Hadien wa tip yeini, kiwa ha-yung u da pyntip ki cha ki pulit kiwa da lai psiah cha i yung wa jia ini heiwa da chem ki ya ka Mohinder Kaur kawa da thiah ha khyndaw neidaw wa mynsoo ko.
Da kit ya ka cha Queen Elizabeth Hospital, Birmingham tangwa da khlaad noh ko hei miet. U Singh da liwan biang u cha ini i yung u hadien kattu katni kynta heiwa da kem noh ki pulit kiwa da yang ya oo.
Heipor wa em ha kti ki pulit da ong u wa ym em mut u wow leh yeini tangwa da jia du neidaw wa joor chrai u.
Discussion about this post