Ha kani ka 30 tarik u Kmaichonglad u dap pura 160 snem nadooh wa ki pharæng da pasi ki ya u Woh Kiang Nangbah u khlawait ki ri Jaiñtia, wei hadien wa talung katni tylli ki snem da yoh u yoo ya ka kot chaphang ka thma laitlooid u Kiang Nangbah pyrchah u ya ki pharæng wa dang dep wot u pynmih.
Kam wow kdaw heini wa ha ka 17 tarik uni u bnai ha ka sngi pynemwarom ya i dap 50 snem ka Jaiñtia Students’ Union, da pynlait paidbah leh ya ka kot “U Kiang Nangbah, the Swordsman With The Stealth of The Tiger” kawa da thoh da u Dr. HH Mohrmen uwa man uwi na kiwa thoh khubor wa da mihkhmat bha hapoh ka jylla Meghalaya uwa da thoh leh ya chiboon tylli ki kot.
Ya kani ka kot da thoh hei ktien pharæng dei wa yooluti leh wa u paaid wa boon wa lang u yohlaad ki wow tip u rap bha chaphang uni u khon dapchynrang ka jaitbru Ynñiaw Wasa.
U Kiang Nangbah toh uwa da yaleh laitlooid uwa dang boon kiwa ym tip bniah bha chaphang yong oo wei ha kani ka kot u Dr. Mohrmen em ko chiboon ki yutip kiwa ki bru emkaam u tip ki chaphang uni u khla ka wait ka ri ka yong i.
Ye u ong wa ka ri wa ka jaitbru yong i da mylliñ ko ya ki parom chaphang u Kiang Nangbah wei embhah wa kani ka kot mih ko heipor iwa biang wow yarap ya ki khon ka ri wa ka pyrthai waroh kawi u tip ki deiwa rap bniah chaphang u Kiang wa ka thma laitlooid kawa yaleh pyrchah ki ya ki pharæng.
Hawa purae ya kani ka kot da chem wa u Dr. Mohrmen da chimlang u na ki tynre kam na ki chithi ki chipai pharæng cha ki heh ki yong ki, kamjooh leh ki parom chaphang u Kiang na ki waheh wasian yong i da khana pateiñ ki na kawi ka pateiñ cha kawi tawon.
Kani ka kot da thoh bniah bha chaphang i yah luti wei i yakhun yong ki chipai u Kiang wei wa kammon u Kiang da ye u wow takleiñ ya ki chipai wa na kiwa dai ri kat haooh wym yoh hi ki oo wow kem.
Ka thma kawa u Kiang yaleh u toh da u khnam wa ka ryntieh kamjooh leh ki moo ki dieiñ pyrchah ya ki suloi ki tup ki chipai pharæng.
Ha kani ka kot da thoh bniah leh chaphang kammon wa ki chipai pharæng hadien wa da tip ki heiyatoh wa i thaw rieh u Kiang da lai ki wow kem ya oo kamjooh leh ha kani ka kot da thoh leh chaphang kammon wa ki chipai da chim bichaar ki ya u Kiang wei wa da rai wow pasi jhan ya oo du hadien kattu katni por don hi.
Kani ka kot kawa em 27 lynnong (Chapter) kawa 150 sla, em ko chiboon ki yutip wa thymme chaphang ka thma laitlooid ki Pnar wa ki War pyrchah ya ki chipai pahræng.
Da khana leh wa katwon ngut ki chipai pharæng wa wan yakhun pyrchah wa ki chipai u Kiang, kamjooh leh u Dolloi Tyngker, kammon ki pharæng thoohlaad ki wow kem ya u Kiang wa kiwi kiwi.
Da chem wa ym toh iwa suk ya ki pharæng u jop ki ya u Kiang, wei ki pharæng leh ym ye ki u pynrem ya ki chipai Jaiñtia nu dei wym em ki dai ri wa kiwa bieij poisa.
Lyngba ka kani ka kot ki paaid waboon walang u yoh ki u puræ kamjooh leh u tip rap bniah chaphang uni u khla ka wait wa khroo uwa ka ri da sdang mylliñ ko.
U Dr. Mohrmen uwa maya ya ka ri wa ka jaitbru natlor wa da kreh chitom u wow thoh ya kani ka kot, da pynlut u leh ka muhor ka kynthiar na oo hi wow pynmih ya kani ka kot kawa i dor yong ka toh T. 250 donhi kawi.
