Ka West Jaiñtia District Sports Association kam chibynta i lehkmen Golden Jubilee ynne ka sngi da pynman ko ya ka Half Marathon hei jngai wa 21.975 Km kawa da sdang nadooh chnong Shkenpyrsit, Amlarem Block wei da pynkut won ha Kiang Nangbah Stadium, Jowai.
Ha kani ka Half Marathon da em 172 ngut (140 ngut ki chynrang wa 32 ngut ki kynthai) kiwa yachimbynta kiwa da wan na ki chnong waphær yong ki District ka jylla kamjooh na baar jylla wei ya kani ka yakob phet da kaweh lama da u Khroobok Passah, District Sports Officer, West Jaiñtia Hills kam u kongsan hei sakhilang u Patrick Lamare, Vice-President WJDSA.
Ha ka yalang pynkut yong kani ka Golden Jubilee Half Marathon wada pynman ha Kiang Nangbah Stadium hei pynlai u Patrick Lamare, da yoh i klam i khana na u E.M.H. Passah, Working President WJDSA chaphang i lai luti ka seiñ heiyatoh wei lehkmen lehburom ya ka Golden Jubilee.
Ka B. Blah, Block Development Officer, Thadlaskein hawa e kyntien kam ka kongsan yong kani ka yalang da yaroh ko ya ki bor pynlai ka WJDSA kam kawi na ki seiñ wa yieñ ha ka yurim wow kyntu kynrong yei kaam yalehke Sports hapoh ka District wei da kitbok kitrwiang ko leh ya ka seiñ kamjooh ya kiwa ya chimbynta ha ki yakob waphær kiwa ka seiñ da booh thong ko u pyndep heiyatoh wei lehkmen Golden Jubilee.
Heiliang ki chynrang kiwa da jop ha kani ka yakop toh u Wolbertstar Ramsiej uwa na Mawkyrwat uwa da pyndep yei phet hapoh i por wa 1 kynta 8 minit 14 second neitae bood ryngkhi won u Ishwor Nepali uwa na Shillong uwa da pyndep yei phet hapoh i por wa 1 kynta 9 minit 12 second katwa u Hari Bhakta Chetri uwa na Shillong won da pyndep u yei phet ha i por wa 1 kynta 16minit 18 second.
Hapyrdi won ki kynthai kiwa dajop ya kani ka yakob toh ka Kyntimon Marwein kawa na Mawkyrwat kawa da pyndep yei phet yong ka hapoh i por wa 1 kynta 26 minit 30 second bood won ka Shyamali Sing kawa na West Bengal kawa da pyndep yei phet yong ka hapoh 1 kynta 33 minit 51 second wa ka Phyrnai Kyndait, East Jaintia Hills kawa da pyndep yei phet hapoh i por wa 1 kynta 37 minit 56 second.
Kiwa jop yong kani ka yakob Golden Jubilee Half Marathon najrong ka Memento kam ka Muhor Sahnaam da yoh ki leh u rah won sa ya ka song poisa wa T. 30,000 ya kiwa yoh nyngkong, T. 20,000 ya kiwa yoh wa ar wa T. 10,000 won ya kiwa yoh wa le.
