Ki chipai wa yah thuk-thuk wa pynyoo yei sap da ki thuk-thuk yong ka Army Service Corps Motorcycle Display Team ya kawa tip kam ki “Tornadoes” da poi ki ha Shillong ynne ka sngi.
Kini ki chipai ka Tornadoes toh ki bynta wa kongsan bha yong ki Indian Army, kiwa jooh pynwyrngia ya ki bru heiyatoh wa ki sap yong ki cha kylleiñ ki thaw.
Ki Tornadoes toh kiwa da sdang ha u 1967, da em ki hadooh 32 tylli ki World Record wei ka yung krehkaam (Base) ki toh ha ASC Centre (South), Bangalore wei kynthup ki ya ki 39 ngut ki chipai ya ki ar ngut ki Officer, ar ngut ki Junior Commissioned Officer wa 35 ngut kiwi ki kyrdan.
Ha ki 50 snem wa dadep, ki Tornadoes da pynyoo ki ya ki sap yong ki ha ki hajar tylli ki tamasa ka ri heiwa da mihkhmat ki ya ka India hadooh 6 sien ha Bhutan. Da ksoh ki leh hadooh 9 tylli ki World Record ha u Khonchonglad (Dec) 2020 ha ki kyrdan waphær waphær kiwa kynthup ya ka Longest Ride lyngba ki Tunnel of Fire, ka Highest & Fastest Pyramid wa kiwi kiwi wei da yah ki leh na ka Karakoram Pass ha i tlang ha ka luti wa 2500 Km ha ki 22 sngi.
Ha ka 8 tarik u Kmaichonglad (Dec) 2022 ka Army Service Corps daw lehkmen ko ya ka 11th Reunion wa ka 262nd Corps Day wei kam chibynta yong ini wei wow kynmoo warom ya ki chipai kiwa da khlaad neibynta ka ri, ki Tornadoes da booh thong ki wow lai 2600 Km da ki thuk-thuk ha ka thaaiñ mihsngi. Ki chipai daw leh warom ki leh ya ki chipai ha ki War Memorial wa em ha ka thaaiñ kam ha ka jylla Assam, Arunachal Pradesh, Manipur, Meghalaya wa Nagaland. Ini i lai luti ki chipai da sdang i na Tezpur ha ka 1 tarik uni u Naichiphaw deiwa lai lyngba ki thaw wa kynthup ya ka Tenga Valley-Bomdila-Sela Pass-Tawang-Fwd Posts of Tawang-Kalaktang-Guwahati-Shillong-Kombrian-Imphal-Dinjan wei wow pynkut won ha Gajraj War Memorial, Tezpur ha ka 17 tarik uni u bnai deiwa lai luti 2600 Km ha ki 17 sngi.
Ki chipai ha kani ka kynti kynthup ki ya 15 ngut ha ki thuk-thuk Royal Enfield wa yahkhmat da u Maj Ramya Venkat wa u Capt AS Grewal heiwa da sdang na Tezpur wei da kaweh lama da u Lt Gen DS Rana, AVSM, YSM, SM, GOC 4 Corps.
Ha ini i lai luti kini ki chipai daw leh warom ki ha War Memorial, Shillong chwa wow mih daw kaweh lama da u Lt Gen KC Panchanathan, GOC, 101 Area ha ka 9 tarik uni u bnai.
