Kiwa lai puræ BSC Nursing yong ka 2nd Batch ha North East Adventist College of Nursing wa em ha Khliehtyrchi neibynta u snem 2022-2023, haka 22 tarik uni u bnai da ya chim smai ki heiyatoh wow lai luti wow man noh kam ki Nurse wei kani ka Course toh kawa jrong 4 snem.
Kani ka BSC Nursing Course ha kani ka College da sdang yaka nadooh u snem 2021, katwa kiwa chim smai ha kani ka sngi won toh kiwa ar namo ka 2nd Batch. Yeini i chim smai da yahkhmat daka Principal In-charge Cum Associate Professor, NEACON ka Bailinda Dkhar.
Ka Principal hawa e yei klam da pyn-ehbok pyn-ehnasib ko ya kiwa puræ Nurse yow jop i lai luti ki chaphrang kamjooh heiyatoh i kaam chakri yong ki neibhah em chiboon kiwa emkaam yei yarap i sumaar yong ki.
Da ong ko leh wa emkaam u em i sñiawthooh ya ki bru wa kjut chitom la heiyatoh i chitom ki hei doh i pran næ i pyrkhat pyrdaiñ wa kiwi, wei kamwa ka phang yong kani ka sngi ong ko “You are the light of the world” ngait skem ko wa ki kaam yong ki leh u tyrchaaiñ u e kyrmen i ya ki bru wa kjut chitom wow yoh ki yei chait la hei doh i pran, i pyrkhat wei mynsien.
Da kyntu ko leh yaki Nurse wow man kiwa sbun mynsien ha i rukom kreh yow wanrah i kyrmen hei mynsien kiwa kjut.
Neiliang ka kongsan yong kani ka sngi ka Jomila Pyngrope, Joint Director Nursing DHS GOM, ong ko ka charak pynyoo ko ka dak i tip i chemphang, i kyrmen, wei kani ka sngi wym mut du wa pynche yei che haka charak tangwa man leh i pynche yaka luti i kyrmen, i maya wei wow chbeh yow lai katkam ka luti wa toh.
“Kam ki Nurse daw yachem ya kutjait ki bru kiwa ye u yaphær hei ngait ñiam, i rukom im wa kiwi de, tangwa ymtoh u ran dien, emkaam u chim yei kaamram dei khooid mynsien wei wow e leh i chakri wa paka neibhah kam ki Nurse em ki ka bor u pynchait yei thij i pyrkhat, i doh i pran wei i mynsien kiwa kjut,” ong ka Jomila Pyngrope.
Heijooh i por kyntu haroh ko wa toh u pynyoo bait dei khmat wa kmen wa e mynsien ya kiwa kjut.
Ha kani ka sngi da yoh i puræ Bible naka Lighty Asmiana, i duwai naka Dr. Jemima Marak, Liaison & Development Officer, i thang yaka charak daka Eudora Blah, Vice Principal Cum Associate Professor, NEACON, i rwai naki khynnah puræ 2nd Semester, i duwai pynwai na u Lairenga Colney, Controller of Examination NEAU katwa ki kyntien khublei da yoh naka Penina Langhu, M.Sc Assistant Professor.
