Jowai: Yow ye u wanrah i khooid i jngiar hapoh ka dong ka chnong, mih paidbah kiwa chong chnong ka chnong Sohmynting hei ya pynkhooid chnong ynne ka 2 tarik wow bood leh ya ka thong u Prime Minister ka Ri India wow pynman yaki chnong ki thaw hapoh ka Ri kiwa khooid nadooh ki sarok ki luti ki syngkieñ wa kiwi kiwi.
Ynne ka 2 tarik u Naichiphaw man ko leh ka sngi kha u Mahatma Gandhi wei kamjooh leh man ko ka sngi wa da dep pynbna da u Prime Minister ya ka Swachh Bharat Abhiyan næ ka (Clean India Mission) heiwa waroh kiwa chong chnong hapoh ka Ri toh u yachim bynta lang ki hei pynkhooid chnong khnang wa chwa ka 2 Naichiphaw 2019 kawa man leh ka lyngngkhooh snem wa 148 ka sngikha u Mahatma Gandhi.
Ha kani ka sngi chwa u sdang ya i pynkhooid chnong da em chwa ka yalang wa tbian ha Community Hall ka chnong heiwa ka Emidaka Mukhim Block Co-ordinator ka tnat PHE yong ka Amlarem Rural Work Sanitary da chim ko ka bynta u pynbaam smai yaki paaid ka chnong dei wow chim ki yei pynkhooid chirta ym du ha kani ka sngi, neibhah yooluti ko wa i wan chimbynta yong ki toh wa ki leh em ki kani ka jooh ka thong. Heijooh i por da e nongmuna ko leh yaka chnong Moosakhia kawa man ka chnong wada ku hei khooid kamjooh wada lait nei lai paikhana taroi ki bru.
Da kyntu ko wow pynemkam hok yaki thaw noh jhep wa booh harood luti, wei u man ki kiwa lehkhooid yow yoh i chait i khiah wa sarot tam neibhah i chait toh i wym yoh u thied.
Neiliang kiwa pyllai chnong wa kynthup ya u Waheh Chnong u Dapoi Pyrtuh, u Secretary VEC u M.L Pyrtuh da khana ki wa hei yatoh wa i pynkhooid chnong kani man ka sien wa ar, wei neiliang ki tnat krehkaam ka sorkar leh da yarap ki yaka chnong nadooh wow thung ya ki dieñ, u booh ya ki thaw nohjhep kamjooh i yarap pynyoh paikhana.
Ha kani ka pynkhooid chnong da yachim bynta chongchit ki paaid ka chnong nadooh ki manbei, manpa, ki khynroo khyllood kamjooh ki khynnah na waroh 4 tylli ki dong ka chnong Sohmynting wa kynthup yaka Dongwah, Dongneiñ, Dong Iawpyrsien waka Dong Dien.
Discussion about this post