Ka Seiñraij Ialong ynne da pyndep ko ya ka Nohsakyriat kawa man ka lehñiam kamjooh ka dustur riti wa rap phær wei kawa da leh du ha Ialong wa ha Nangbah.
Ka lehkmen Nohsakyriat man ko leh kam chibynta wow lehkmen waka bei rymaw hadien wa da pyndep chwa ya ki leh niam 8 sngi chwa nadooh ka sngi Muchai wadep wei da pyndep lut ynne ka sngi chwa wow ye u hiar cha ki lyngkha yow thung ya u symbe u phniang.
Neiliang u President ka Seiñraij Ialaong, u Pyrkhat Shylla da pyntip u wa kani ka lehñiam toh neibynta ki 30 Ryngkaw heiwa em ha ki snem da kñia du ha uwi u Ryngkaw tangwa ha uni u snem da kñia ha waroh ki 30 Ryngkaw wei da jooh leh leh ya ka Kñia Sapet Bneiñ wa kñia da ka masi iwa da leh chisien 5 snem wei lada ym ye, da leh won chisien 7 snem wei kani da toh por wow leh noh ya ka ha ki por wow wan.
Ki Sakyriat wa da pynkhreh ha uni u snem rap boon ki wei da yoh leh u chimbynta chynrang wa kynthai kiwa da chna kyrpang i heh i kmai neibynta kiwa da heh kamjooh ki khynnah.
Ha uni u snem da wan wow sakhi ya kani ka Nohsakyriat da u MLA ka Jowai u Wailadmiki Shylla wa u Dolloi ka Elaka Shangpung, u Chanki Langbang.
Neiliang u Dolloi da ong u wa ngait skem u wa ki 30 Ryngkaw kamwa da ngooh, da dem ynne ka sngi, kamwa dadep ya ka Puja Pukan kamtæ ki Blai ki Syiem daw theh ki ya ka kyrkhu ya ka chnong ka thaw ka raij wa kawi pa kawi ka manyung yow yoh dei chait dei tram, dei roi i paar ha waroh ki liang.
Da ong u leh wa kani ka sngi toh wow lehkmen wow chaad, wow ka-it kasar kamwa da pynjooh da ki longchwa manchwa wei kam kiwa rap yeini toh u nang pynbha pynmiat chooh chooh i wei wow pynskem pynskit wa ki kti hikai ya ka ñiam ka rukom.
Ha kani ka sngi kiwa da wan chimbynta da pynyphooh ki ya kani ka Nohskyriat da i mynsien chongchit wa da ki riam tynre.
Mynstep won daw pteiñ da ka Chaad Sukra.
