ka Meghalaya State Kickboxing Association (MSKA) da e khublei wei kitbok kitrwiang ko hajrong i chah jied u Hame Shaniah Suiam, Assistant Coach WAKO India wow mihkhmat yow lai chimbynta neibynta ka ri India cha ka Wako National Federation Development Seminar and Coaching Workshop nadooh 17-19 tarik uni u bnai (March) 2022 ha Bahrain.
Ki le ngut kiwi na India ki wow chimbynta lang ha Bahrain najrong u Hame Shaniah Suiam, Assistant Coach WAKO India toh u Santosh K Agrawal, President WAKO India Kickboxing Federation uwa man leh u dkhot ka WAKO Technical Committee, u C. Suresh Babu, Chief Coach WAKO India wa u Nilesh Shivaji Shelar, Senior Coach WAKO India.
Ini da man sakhiat ko ka kabu ksiar heiwa u Hame Shaniah Suiam daw yoh u nang pynpliah ya idæ khnang wow man won i myntoi kylla wow sikai ya ki khynnah wa yaleh Kickboxing ka jylla ha ki por wa daw wan neini chakhmat.
Ha kani ka Wako National Federation Development Seminar and Coaching Workshop daw wan ya chimbynta da ki Coach wa kiwa yalehke wa pawnaam wa kiwa paawkhmat ha ka pyrthai ha ka yalehke Kickboxing kawa da yoh leh yei tipmit na ka International Olympic Committee (IOC).
