theme-sticky-logo-alt
theme-logo-alt

Mar ya dep chna, yieñ laiñ wot ki Truck ha ka yingkieñ Sonapur

Ka yingkieñ Umpasu Sonapur kawa dang dep wot ka NHAI wow pynchna ha kani ka 15 tarik hadien wa da kaad da piah ko ha kiwa boon ki bynta. Neiliang kiwa chong chnong won da yoo phylla ki wa nadooh ynnin i janmiet 3:00 waje hadooh kattæ ki Truck khlem sangeh da yieñ da sangeh ki hajrong kani ka yingkieñ neidaw wa em leh i sahkut kari ha ka thaaiñ Sonapur-Kuliang.

Hawa yoh u yaklam u Wyrta wa u Project Director ka NHAI, EJH u N. Verma da pyntip u wa neiliang yong ki na ki por cha ki por da thoh ki cha ki bor District wym toh u chah u pynyieñ kari hajrong kani ka yingkieñ kamjooh ha kiwon kiwon ki jait yingkieñ nadooh kiwa khian hadooh ki wa heh neibhah ini da ktah bha ko ya ki yingkieñ.

Da pynche u leh wa lada ki kari hap ki wow sangeh (Brake) heipor wa lai luti naka yingkieñ ktah bha ko ya ka yingkieñ waroh kawi heiwa ha kani ka yingkieñ da ong u wa da em i pynsangeh kari da ki BSF i wym em yarap ya kani ka yingkieñ wei daw chah pynbaad cha ka NHAI manda sih ka yingkieñ.

Da kdaw u leh wa la heiwon heiwon i thaw wa hap sangeh boon ki kari lada kam ha ki Check Post ki pulit leh da chem wa u sarok da sih bait u deiwa e nongmuna wa ha ki Toll Plaza da chna da u sarok wa rap phær wei da i khandaw-bilat ym toh dei psiang yow lait u sih ki bynta wa hap sangeh ma sangeh ki kari.

Chooh chooh da pyntip u wa ya ka Load Test yong kani ka yingkieñ ha Sonapur da dep leh ha ka 12-13 tarik uni u bnai wei ya ka Result ym pu yoh kamtæ ym pu nood wow ong hadooh katwon da chkeh kani ka yingkieñ hadien wa dep pynchna ka tangwa kamwa man kattæ da pynlait wow lai waroh ki jait kari.

Hawa yaklam wa u DC ka District, da ong u wa ym tip u ya ini i sahkut ki kari ha ka yingkieñ wei oo leh neiliang yong oo da pdiang u wa i em ki BSF wa pynsangeh kari da ktah ko ya kani ka yingkieñ wei daw pyrchang u leh wow phah kyrriah thaw ki chawi.

Share this:
Previous

Phah pynchna ka PWD deiwi ya u sarok hadien wa pynsangeh ka chnong Thangrain waka KSU

Next

Chimbynta u Hame Shaniah Suiam ha ka Coaching Workshop ha Bahrain