Ynne ka sngi u Symbood Montri Rangbah ka sorkar jylla, u Sniawbhalang Dhar da lai chimbynta u ha ka yalang ya phyllu wa da pynman da ka Thomas Jones Synod College Jowai hajrong kammon u pynkhlan ya ka mynried ki khon khynroo khyllood ya kawa da tip kam ka “Empowering Tomorrow: An Avenue Towards Excellence”.
Ha kani ka yachem yumut da emlang ki khynroo khyllod puræ, ki bei ki pa yong kiwa lai puræ deilang kiwa sikai wa ki dkhot k Governing Body ka College.
Neiliang u Octomewot Lamin, Nominated MDC ka JHADC kam u symbood kongsan ha kani ka sngi, da ban joor u hajrong i emkaam i ya krehlang khnang yow ye u pynkhlan ya ka mynried ki khynroo khyllood ha ka luti u ku chaphrang.
Neibynta ki khon khynroo khyllood wa lai puræ ong u emkaam u minot puræ kot heipor wa dang lai skur khnang yow hoi bru hadien habood, neibhah katwon u man i kmen wa khroo ya ki bei ki pa wa da pynlut pynsep hawa ki khon yong ki poi ki cha ka thong.
Neibynta ki bei ki pa won ong u ha kini ki sngi toh u e mynsien leh ya ki khon ha kawon kawon ka sap wa em ki, kamwa ka sorkar leh da wai ko chiboon ki laad ki kabu neibynta ki khon khynroo khyllood ha jar jiar i sap wa em ki.
Neiliang u kongsan, u Sniawbhalang Dhar won hawa klam ong u wa dap u dei kmen u yoh saam ya ki sboh pyrkhat heiyatoh wa ka phang neibynta u pynkhlan ya ka mynried ki khon khynroo khyllood hanla man ka yalang wa khian leh tangwa kawa chongkhia bha.
Wei kamwa boon hi i eh wa maad tyngkhooh ki thaw puræ, pyntip u wa neiliang ka sorkar leh da pyrchang lehbha ko nadooh i pynchna najrong wa e kyrchaan poisa ya ki skur ki College.
Yaroh u leh ya ki bor pynlai ka Thomas Jones Synod College wa yoo jngai ko u pynman kam kani ka rynsan yachem yumut ha chirup ki khynroo khyllood puræ, ki manbei manpa khnang yow tip ha kawon ka rukom u pynku yei puræ puthi.
Ong u wa em leh ki bynta wa chem chitom saja ki thaw puræ wei da yaklam leh yeini.
Chooh chooh ong u ka Thomas Jones Synod College man ko ka College wa ku neipor cheipor wei manda khynnia ka Kiang Nangbah Govt. College, ki khynnah puræ yoh ki u lai heini katwa em ko ha pyrdi ka District, heiwa neiliang ka sorkar leh jooh yarap kyrchaan bait ko ya kani ka College.
Kamwa kani ka College da pynsñiaw ko leh sa kiwi tawon kiwa emkaam yong ka heiyatoh i tei i chna, kam ka Auditorium, wow yarap heiyatoh ka tulop kiwa sikai, kamtæ ong u neiliang ka sorkar daw pait ko kiwon wa ye u yarap wei daw leh ko yeitæ khamtam wa katni da boon bha kiwa puræ ha kani ka College.
Discussion about this post