Ynne ka sngi ka seiñ Lok Janshakti Party (LJP) Meghalaya State lyngba u President yong ka, u Jamil Ahmed da thoh u cha u Montri Rangbah ka jylla, u Conrad Sangma heiyatoh wa i dooh thaw puræ ki 144 ngut ki khynnah na Ri-loom Jaiñtia heiwa da kyntu ya u Conrad wow chimkhia ya ini.
Ha ka chithi, u Jamil da kdaw u wa u Chief Justice of India (wa da chong-ngiah), u PN Bhagwati da ong u, “The child is a soul with a being, a nature and capacities of its own, who must be helped to find them, to grow into their maturity, into a fullness of physical and vital energy and the utmost breadth, depth and height of its emotional, intellectual and spiritual being; otherwise there cannot be a healthy growth of the nation”, namo (hawa pynkylla dei Pnar) da ong u “Ki khynnah toh i mynsien ha i rynyieñ, kiwa em i rukom im wa i bor, kiwa emkaam yarap wow chem ki yei manbru wow chran ki, hei thij i pyrkhat, lym kamtæ ymye wow pynku ya ka ri waroh kawi’.
Kam wow pynkynmoo heini wa ya kani ka chithi da thoh cha u Montri Rangbah hadien wa pynman yakhih ki soo ngut ki heh ka JYF wa JSM ha ka 10 tarik uni u bnai heiyatoh wa i dooh thaw puræ kini ki khynnah.
Hajrong ini i jooh i kaam ka seiñ JYF lyngba u President yong ka da thoh u cha u President ka LJP ha ka 27-10-21 wow chimkhia hajrong ini i dooh thaw puræ kini ki khynnah.
Hawa yaklam wa u Jamil Ahmed da ong u wa ka sorkar jylla, khamtam ka chnat puræ puthi da rem ko hei wow pdiang wei wow e ya i puræ puthi ya kini ki 144 ngut ki khynnah iwa da pynbor ya ki heh ka JYF wa JSM wow pynman ki ya i yakhih ha Jowai.
Da kyntu u leh ya ka sorkar wei khamtam ya u Montri Rangbah ka jylla wow chimkhia yeini wei wow pdiang noh ya kini ki khynnah neibynta ka mynried ka yong ki khnang wow lait ko u man kawa sepai.
