Jowai : Hadien wada sangeh krehkaam kiwa kreh ka Jowai Municipal Board i jhep wa mih na Jowai khamtam na Iawmusianh da lang i wei da kylla man ko ka thaw kawa sma kawa tung kawa da dap du ki phre.
Ynne i step ki chilok kiwa chong wa sah ha chnong Jowai hapoh i yahkhmat u Nehemaya Tyngkan da hiar ki wow pynkhooid yeini i jhep wa lang heini i bynta ka Iaw. Katkam ka yutip wada yoh da ong wa boon na kini ki chilok kiwa em kamwa 13-14 ngut toh kiwa na palat chnong wei kiwa chong sah kreh sah mylla ha Jowai.
Da sdang u pynkhooid ya kani ka yaw heipor kamwa 6:45 i step heiwa da pynemkaam da ki belcha wa ki kari pick-up yow kit yeini i jhep na kani ka thaw yow linoh cha thaw nohjhep wa thymme wa em ha sarok Jowai-Amlarem.
Hadien kattu katni por da em wi ar ngut ki bru paidbah hadien wa yoo yeini da wan yarap ki ya kini ki chilok yei kaam wabha yong ki.
Heijooh i por neiliang ki dkhot ka Jaiñtia Journalist Association dei mynsien wa sñiawkhia da e yarap kti timun tidiang ya kini ki chilok yow pynkhooid ya kani ka thaw kiwa da phone ya u DC ka WJH yow phah u ya ka kari tymplehdiñ yow siat um ya kani ka thaw yow khooid ko wei yow wiar i sma.
Hei yoh u yaklam wa u ma Nehemaya Tyngkan da ong u wa dei mynsien wa sñiawkhia chirup wa ki lok yong oo hadien wada yoo ki yeini i jhep wa lang ha ini i thaw iwa ye u wanrah ya ki kjut wa ha rukom ya ki paidbah khamtam ki khynnah skur wa lai wa wan na ini i thaw da rai ki pyn ynnin i miet yow pynkhooid ya ini i jhep.
Heiyatoh wei bailutsan ha ini i pynkhooid da ong u wa ini waroh da pynlut u na kata yong oo hi wa kajiak na ki lok ki yong oo wei ym em yoh yarap iwon iwon nabar.
Da kyntu u ma Tyngkan leh ya ki paidbah yow man ki kiwa lehkhooid khnang yow yoh i i doh i pran iwa chait wa khiah.
Neiliang u General Secretary ka JJA da ong kyntu u wa emkaam yow poi noh i yasñiawthooh yamut hapyrdi ka Sorkar wa ki paidbah wow wanrah ya ka chnong Jowai yow man ko kawa khooid wa jngiar.
Neiliang u DC da smat u wow phah ya kani ka kari tymplehdiñ yow siat um ko ha kani ka thaw wa ki dooid wa em narood sarok kiwa da dap sadu ki jhep donhi.
Ynne ka sngi ki kari pick-up wada embynta em ki soo tylli wei da kit ki leh yei jhep wow noh cha i thaw nohjhep hadooh palat le khyrwit taam wei ka kari tymlpehdiñ leh da wan ko ar sien yow siat ya kani ka thaw wa ki dooid wa em harood sarok.
Discussion about this post