Jowai: Katkam wa man katni hadien wa da sdang pynkrehkaam ya ka Lockdown kawa 21 sngi wow yakhun pyrchah ya ka khlam u COVID-19 da em chiboon kiwa khih mylla sngi ha poh jylla kiwa da dooh kreh iwa da ktah ya ki liang wanang.
Neiliang ka sorkar jylla kam chibynta wow pyntikna wa kini kiwa dooh khih ym chah ktah ware ki hei rukom im yong ki iwa man ka sngi kam ki bru, lyngba ka chnat Labour chirup wa ka Department of Revenue & Disaster Management da pyrkhat ko wow sdang ya ka State Emergency Operation Centre (EOC) wei da booh leh ya u Phone Number wow e yarap ya kiwa da chah ktah.
Ka chnat da rai ko wow e yarap poisa cha kam kini ki bru kiwa chah ktah deiwa phah ki ya ki yutip wa bniah hajrong i khih i kreh wei wa kiwi kiwi ki yutip wa emkaam wei wow phah yeini i jooh cha ka yung krehkaam ka chnat namo lyngba u Whatsapp ha u Number 8794731937.
Iwa chem chitom won ki bru wa ye u yoh myntoi neini toh neidaw wymye ki u pynpoi ya kini ki yutip cha ki yung krehkaam ka chnat neidaw wa krehkaam ka Curfew wa neidaw wa em kiwa boon kiwa ymjoh i bor wow pynemkaam ya ka WhatsApp.
Kamtæ da em ki kattu katni ki chnong kiwa em hapoh ka Laskeiñ C&RD Block kiwa da chim ya ka lyngkor wow yarap ya kam kini ki bru wow pynsuk ya ki deiwa pynlang ya ki pyrtuid yong ki ha kini ki 2-3 sngi wa dadep.
Hadooh wa man ynne ka sngi da em chiboon ki chnong kiwa da chimkhia yeini hapoh ka Block wei kini kynthup ki ya ka Madankynsaw, Khonchnong, Khlookynrin, Raliang, Moolibang Shangpung, Mynska, Khliehrangnah, Pasyih, Pyntei wa kiwi kiwi,
Wei katkam wa man hadooh ynne i janmiet da ye wow pynpoi ya ki pyrtuid wa ki yutip wa bniah yong ki palat 1,100 ngut ki bru.
Heini ye i u ong wa i leh yong kini ki dorbar chnong u man i leh kam ka nongmuna ya kiwi tawon ki chnong hapoh ka District wa ka jylla neibhah kam ha kini ki por man i iwa emkaam ya i yarap wa i chaan kylliang iwi ya iwi.
Discussion about this post