Shillong: Hadien wa mih kawi ka khubor wa poor lyngba ki Social Media wa ong wa em uwi u Muslim uwa em bynta ha ka yalang ki ngait niam ha nongbah New Delhi neiwa da sdang u poor u khñiang COVID-19 da chah kem u ha Byrnihat katwa 2 ngut ki lok yong oo da yut ki wei ymtip cheiwon em ki (2 ngut) wei da yut ki na ki thaw kset (Quarantine) dei thmu wow pynpoor ya uni u khñiang, neiliang ka Meghalaya Police da ong ko wa kani man ko ka khubor thok ka khubor hamsaya donhi.
Neiliang u Asst. Inspector General of Police (A), u G.K. Iangrai da pynche u wa em ki ar ngut kiwa na Barpeta, Assam kiwa da wan cha Byrnihat ha kawi ka kari wei heipor wa dang lai luti ki da ksoh ya ki da ki paidbah ka chnong wei da ekti ya kini ki ar ngut cha ki pulit.
Da ong u wa hadien wa takit ya ki da pyntip ki wa toh ki bru wa wan dai jhoor wei da wan ki na Assam cha Meghalaya wow dai jhoor donhi. Hadien ini da pynsakhiat leh wa kini ki ar ngut ym em u lai chimbynta ki ha ka yalang Tablighi Meet ha Nizamuddin, ha Nongbah New Delhi wei ym em u yut ki na ki thaw khang kset (Quarantine) ha Assam.
Hajrong ini waroh neiliang ki pulit dang pynman ki yei takit wow chemdien ya kiwa emkti wow pynpoor ya kam kini ki khubor hamsaya ki wym toh kiwa sakhiat.
Discussion about this post