Kiwa sikai ka Samagra Shiksha Abhiyan (SSA) hapoh ka jylla kiwa da pynman yakhih ynne ka 15 tarik ha thaw pynyieñ kari harood ka Additional Secretariat da mynjur ki wow pynkut noh chwa chipor yei yakhih hadien wa ka Chief Secretary ka jylla, ka RV Suchiang da khut yaklam ko ya ki ha ka 18 tarik uni u bnai.
Kiwa sikai SSA hapoh ka lama yong ka All Meghalaya SSA School Teachers Association (AMSSASTA) da sdang yakhih ki deiwa chong kyllaiñ myngngor ynne ka sngi neibhah ym yoh ki ya ka tulop kattu la 5 bnai.
U L. Marngar uwa man u President ka AMSSATSA da ong u wa da yohbor wow pynman ya ka yakhih ynne toh hadooh 4:00 waje nohchariñ ka sngi, wei kam kiwa sikai u burom ki ya ka hukum ka sorkar deiwa sangeh chwa ya i yakhih.
Da ong u wa i dawa yong ki katni toh wow yoh bait ya ka tulop waroh san bnai, wei ym pdiang de ki ya i tyrwa tulop wa ar bnai, wei lada ka sorkar ymye ko wow e ya ka tulop waroh san bnai ym yohsa neiliang yong ki daw pteiñ biang ki yei yakhih wow dawa tulop.
