Da u: Shimphang Lyngdoh, Lumputhoi
Ynñiaw ngut ki MLA napoh ri-loom Jaiñtia,
Wow kit wow bah ya ka chon ka khia;
Kam chipayu dei jooh i mynsien,
Ya ka ri lajong phi wow chan skem.
Ha kam kani ka por wa chem jinjar,
Kat chawa mut u lai da sñiaw teiñsar;
Phi kam kiwa mihkhmat paidbah,
To yoo wyrai ya ki kynthai khynnah.
Ka roi ka paar wa emkaam bha,
Jar ki konstitwensi to rah yei kylla;
Ham hun u pait du ki khmat donhi,
Kam wada kular phi nachwa ki sngi.
To pynkreh kaam hok yei wada kular,
Ha ri-loom Jaiñtia waroh salonsar;
Ki skur ki kolej um-baam wa ki thaw sumaar,
Wa kiwi kiwi dæ ki chnat sorkar.
Kam kiwa chna aiñ phi wow thooh lad thooh luti,
Katwa dang em phi ha ka chuki;
Ham yaphær i sñiaw hei thij hei pyrkhat,
To pyrchang lehbha katwa chah ka laad.
Da kawi ka sur khlem artatien,
Yeiñ ha ka yurim nadooh mynsien;
Ri-loom Jaiñtia yow nangku chaphrang,
Na ki kha-kti yong phi ki khon dap chynrang.
To chna chooh chooh chiboon ki aiñ wa bha,
Ya ki khyndaw ki chyiap yow ye u yada;
Yoh u neh u sah ki teiñ la pateiñ,
Burom yong phi wow neh na khyndaw ha bneiñ.
Yeiñ tylli MLA ki ynñiaw konstitwensi,
Kam chiyung chisem ham ya adnood bichni;
Kti timun tidiang chirup to ksoh,
Manda poi biang ka pali yaphi hi u yoh roh.
Chisien wada klam bru dei kaam,
Da eh ya phi u pyndooh pyndam;
Ham khmied cha jngai leh yeiwa pyn haphrang,
Yoh u lait u silet yeiwa kwah wa thrang.
