Ynne ka sngi da man ko ka sngi wow sah kynmoo sah parom ya ki khon ka Niamtre ka chnong Mowtyrshiah-B, West Jaiñtia Hills heiwa da yoh u wai ya ka Khnap Thang-bru wow pyndep ya ka niam thang ya kiwa da khlaad.
Ya kani ka Khnap Thang-bru kawa da tip leh kam ka (L) Kambel Shullai Eco Friendly Crematorium da wai ha ka yalang wa tbian heiwa u MLA ka thaaiñ u Nujorki Sungoh da man u kam u kongsan hei emlang ki MDC u Winning G Sungoh wa u Robinus Syngkon.
Ya kani ka Khnap Thang-bru ka Seinraij Mowtyrshiah da chna pyndep hei lut wa T. 27 lak heiwa u MLA warim ka thaaiñ u Robinus Syngkon da e u T. 10 lak katwa u MLA wa katni u Nujorki Sungoh won da e u T. 10 lak, ka T. 7 lak won toh kawa da synniang da ki khon ka Seiñraij Mowtyrshiah-B.
Kani ka Khnap Thang-bru da man ko leh kam ka nongmuna yong i ngait i pynjooh i sikai ki warim yong ka jaitbru Pnar iwa ong ‘Rap Kylliang Chaan Kylliang’ heiwa i yatylli da yarap wow chna ya kani ka thaw ym du da ki khon ka Seiñraij tangwa wot ki khon ka Balang Presbyterian wa Balang Catholic.
Ya ka yalang ynne ka sngi da pynlai da u Limow Shadap heiwa da yoh i klam pdiang burom na u Mehiiowki Wann, u Yesthree Lapasam uwa man u Waheh Chnong ka Mowtyrshiah-B, u Chawas Lyngdoh uwa man kam u Dolloi ka Elaka Raliang, u Puramon Kynjing Dolloi Elaka Jowai, u OR Challam uwa man u President ka Seiñraij Jowai wa kiwi kiwi.
Neiliang u Nujorki kam u kongsan da ekhublei u ya waroh kiwa da embynta wow chna ya kani ka Khnap Thang-bru ka wow pynsuk hawa pyndep ya ka niam manda em wa yap hapoh ka chnong.
Da ong u wa em chiboon i duna ha ki chnong ki thaw nadooh ki sarok, ki luti syngkieñ wa kiwi kiwi deiwa kyntu wow man kiwa yatylli wow kreh neibynta i emkaam ka imlang sahlang khnang wow ye u pynku ya ka.
U Nujorki da ong u wa ka jaitbru yong i man ko kawa embhah tam neibhah kat iwa emkaam da yoh i lada kyruiñ cha kiwi ki thaw em kiwa kjam bha, em won kiwa chit bha wei em wot ha ki thaw rep da pynemkaam ya ki kor wow pynpoi um tangwa heini ha i da lait i yeitæ waroh katwa kamtæ emkaam wow yada ya ka rymaw.
Da pynkut ya ka yalang da ki kyntien khublei na u Shainsuk Biam.
Ya ka sngi da pynphooh ya ka yalang da ki chaad rwai na ki khon ka Seiñraij.
