U Montri Rangbah ka jylla u Conrad Sangma, deilang wa Symbood Montri Rangbah u Prestone Tynsong, u Montri ka chnat bordiñ u James P K Sangma, ki MLA wa kynthup ya u Thomas A Sangma wa u SG Esmatur Mominin da booh mooyurim ki yow pynchna wei wow pynku kyrdan ya u sarok Rongram-Phulbari Hill Road ynne ka sngi ha West Garo Hills.
Uni u sarok wa jrong 60 Km, da mang wow pynlut T. 139 klur ka wow sdang nadooh 85th Km ka NH-51 ha Rongram Bazar kawa lai luti na ki loom yow yachem ya u sarok AMPT Road ha chnong Phulbari. Uni u sarok toh kawa haap hapoh ki sarok State Highway uwa daw pynyabi yaka chnong Tura wa Phulbari.
Uni u sarok daw pynyabi u leh ya 40 tylli ki chnong kiwa im hei rep i riang, uwa daw pynsuk yaki hei lai i wan, uwa daw man leh u sarok psiang, uwa daw em ki dooid, ki kynroh yada wa kiwi kiwi.
U Conrad hei klam yong oo da ong u wa uni u sarok toh uwi na kiwa rim dooh ha ri-loom Garo wei u pa yong oo u (L) PA Sangma jooh khana u ya oo chaphang uni u sarok uwa da chah ieh da boon snem wei nadooh ki por yong oo leh da kwah u wow pynchna ya uni u sarok, kamtæ u Conrad da pynsñiaw u yei kmen wa kani ka sorkar da ye ko wow leh ya ini.
Da ong u leh wa ka sorkar yong oo ha kini ki 3 snem da pynlut ko T. 1800 klur du neibynta ki sarok ha ri-loom Garo wei u pteiñ yei kreh wow pynbiang yaki sarok ha waroh kawi ka jylla.
Neiliang u Prestone Tyngsong uwa man leh kam u Montri ka chnat PWD da ong u wa chwa u snem 2018, tlot bha i pynkrehkaam yaki sarok PMGSY katwa katni hapoh ka jylla waroh kawi i kreh hapoh ka PMGSY da poi ko T. 2800 klur.
Da phah u leh ya u DC deilang waka chnat PWD wow paitbniah yei kreh ya uni u sarok yow pyntikna wa ye u pyndep ha u Kmaichonglad (Dec) 2022.
