15 49.0138 8.38624 1 0 4000 1 https://wyrta.com 300 0

Chirup wa ki pulit kem ka FKJGP ya i drugs wa u bhang na kiwa boon ki bynta ka Shillong

0 Comments
Advertisement ad1

Shillong: Ki dkhot ka Federation of Khasi Jaiñtia and Garo People (FKJGP) chirup wa ki dkhot ka Mawprem wa Mawlai Circle ynnin ka sngi nadooh i por 12 waje i sngi hadooh 4 waje ynne i step 12 tarik da kynreh ki ya kiwa dai drugs ha kylleiñ ki bynta ha ka thaaiñ Polo, Mawlai wa Riatsamthiah.

Ha ini da emlang ki pulit ka Anti Narcotics Task Force (ANTF) heiwa da lai kynreh ya le tylli ki yung kiwa em ha Polo, Mawlai Nongpathaw wa Riatsamthiah heiwa da khyrrup chiboon ki drugs wa ka poisa.

Advertisement ad1

Ha ini i kynreh da kem ar ngut kiwa dai drugs ynnin i miet wei hadien wa pteiñ yei kynreh da chem chooh ya i drugs ryngkat ka poisa da ki phaw hajar.

Ha ini i kynreh ki dkhot ka FKJGP da ksoh chwa ki ya uwi u khynroo wa tip kam u Ashanbor Nongspung, 23 snem na ka chnong Smit, wei da ksoh ya oo na Polo heipor 5:30 janmiet, wei na oo da yoh yei drugs kamwa 0.11gram ryngkat ka poisa T.3660.

Hawa takit ya oo da phla u wa thied u yeini i drugs na Mawlai Nongpathaw na uwi won u bru wa tip kam u Marvinson Jyrwa.

Ya u Ashanbor da ekti noh cha ki pulit ka ANTF, wei da pteiñ wow kem sa uwi won na Mawlai Mawdatbaki, Nongpathaw.

Hadien wa kynreh yei yung sah u Marvinson da yoh hadooh 36.32 gram u heroin wa ka poisa T.46,960.

Hadien wa takit ya uni u bru ki pulit da lai kynreh ki sa i yung sah u Benjamin Marbaniang, katkam wa phla da kiwa chah kem chwa, wei heipor 11:30 i miet da lai sa ha yung sah u Johanan Shullai wa khut sin u Jo Bat-Man heipor 12:30 i step synyaw.

Na yung u Benjamin Marbaniang ha Raitsamthiah da khyrrup 12 gram i drugs wa ka poisa T. 27,000 ryngkat u bhang wa khia 0.32 gram.

Katwa na u Johanan Shullai ki pulit ka ANTF da yoh ki 0.12 gram i drugs, 23 tylli ki thyrnia injek wa ka poisa T.1, 15, 000.

Neiliang kiwa kitkaam ka FKJGP da ong ki wa ki pulit toh u pynkhor ki wei wow kreh chitom ki wow ye u pyndoohjait ya kini ki mar pynmuaid.

Advertisement ad1

0 Comments

Leave a Reply