Jowai : Ki pulit ka Traffic Branch ka Jowai kamwa da leh ha kini ki tayaw wa da dep, dang pteiñ i e sikai ki ya ki khynnah skur kamjooh ki khynnah College hei yatoh wa i hok yong ki kam kiwa lai kjat wei emkaam leh u man ki kiwa lehkhooid.
Ynnin ki pulit da esikai ki ya ki khynnah ka Thomas Jones Synod College, katwa ynne ka 16 tarik da e sikai ki ya ki khynnah ka Tpep Pale Secondary School wa ka Little Flower Secondary School.
Hadien wa da e sikai ya ki da em i lai kjat ki khynnah na ki luti lai kjat næ ki footpath, kiwa em ha Iawmusiang, wei da pynchlur leh ya ki wow pynemkaam ki ya ki Zebra Crossing kiwa da booh yow kaap chiliang ki ya ki sarok psiang.
Ym du kattæ ki pulit da e ki leh ya ki tin noh-jhep cha kini ki skur kamjooh ynne ka sngi da e ya kini ki tin ha ka Office ka DSEO, Jowai.
Ya kini ki tin da e yow booh ki skur wa ki office ha pchem yong ki wei kam chibynta yow pynchlur ya ki khynnah kamjooh kiwa heh yow man ki kiwa leh khooid deiwa nohjhep ki hapoh kini ki tin.
Discussion about this post