Jowai: Ki pulit ka Cyber Cell ka Dwarka District Delhi chirup wa ki pulit ka Meghalaya da yoh ki u kem ki ya arngut kiwa na ki ri wa em ha Africa deilang wa uwi uwa na Shillong hadien wa thok ki ya kawi ka kynthai T. 20 lak tam kawa na Shillong.
Kiwa chah kem toh na ka ri Ghana uwa tip kam u Osei Prince (27 snem), uwi na Ivory Coast uwa tip kam u Diarra Habib (22 snem) wa uwa na Shillong u Maxerick Syiemlieh uwa dang 19 snem.
Katkam wa ong ki pulit kawi ka kynthai da chah thok ko ha uwi u bru wa kam toh uwa na UK ha kini ki bnai wa dadep uwa e pyrtuid kam u Owen Galvin uwa da pynyatoh lok wa kani ka kynthai ha Facebook.
Kani ka kynthai da pyntip ko wa u Galvin da pyntip u cha ka wa da phah u cha ka ya ka poisa wa $50,000 kawa da poi T. 3 Klur tam ha ka poisa India.
Hadien kattu katni sngi kani ka kynthai da yoh phone ko na u bru wa ym tipmit ko uwa phah wan ya ka cha Customs Office yow chim ya ka yusong yong ka kawa poi na UK wei da phah su ya ka ya ka dan Custom Duty yow ye u pynlait iwa yoh ko wei da su ko ya ini wei da kheiñ lang ya ka GST waka Income Tax wei waroh da su ko T. 20,64,384.
Hadien wa sñiawthooh ko wa da chah thok ko da lai ko cha ki pulit ha Shillong wow ujor yeiwa jia ya ka wei ki pulit da pynman ki ya ka takit wei da phah ki ya ki ar ngut ki pulit na Shillong wow lai cha Delhi wow pynman ya i takit.
Ki pulit ka Cyber Cell ka Dwarka District wa ki pulit ka Shillong da kem ki ya ki le ngut na Shivam Dapartment wa em ha Mandir Wali Gali ha Mahavir Enclave-I, Delhi.
Hawa pynman ya ka takit da chem wa kini ki le ngut da pynyatoh lok ki wa kiwa boon ki bru lyngba ka Facebook, WhatsApp wa kiwi kiwi wei da pynbiej ki ya kiwa boon deiwa kular wow e sñiawbha da ka poisa ki tiar syad-dor wa boonjait wei hadien wa da chah pynbiej ki, u Syiemlieh da phone u ya ki deiwa kam wa oo toh uwa na ka chnat Custom wei hadien wa thap poisa ki ha ki bank account da sai ya kani ka poisa lyngba ki ATM.
Source: Millennium Post
Discussion about this post