Ynne ka sngi u Montri ka chnat puræ puthi ka jylla, u Lahkmen Rymbui da booh u ya ki le tylli ki mooyurim neibynta wow chna ya ki yung skur ka Shkenpyrsit RMSA Secondary School, ka Madantyrpait Govt. LP School wa ka Mupyut Govt. LP School kamjooh leh ya u mooyurim ka Mupyut Water Supply Scheme.
Ha kani ka sngi da emlang leh u Addl. Chief Secretary ka jylla, u DP Wahlang, u Director ka chnat puræ puthi u Ambrose Ch Marak, u Chief Engineer ka PHE, u CR Challam wa kiwi kiwi.
U CR Challam hawa e i klam ha kani ka sngi da pyntip u wa ka Scheme um Mupyut Water Supply Scheme kawa T. 7.46 klur da booh thong wow pyndep hapoh 6 bnai donhi heiwa ya ka um u riñ na ki soo thaw deiwa kyntu ya ki paidbah ka chnong wow pynneh pynsah ya ki tyllong um heiwa u yoh um-kor waroh ki manyung ka chnong.
U Ambrose Marak da yaroh u ya u Lahkmen Rymbui heiwa kam u Montri da yaleh u wow pynku ya i stat i tip hapoh ka thaaiñ War Jaiñtia.
Da pyntip u wa ka chnat da chem ko wa na ki 56,000 ngut kiwa sikai skur ha ka jylla da em du kamwa 25,000 ngut kiwa da chim tika yada COVID-19 deiwa kyntu ya kiwa sikai wow wan chaphrang wow chim ya i tika.
Heijooh i por da kyntu u leh ya waroh khamtam ya ki khynnah wow wan ki chaphrang wow leh ya ka Aadhaar neibhah wa boon ki laad yarap wa ye u yoh hadien wa pynpsiah pyrtuid ha u Aadhaar.
U DP Wahlang hawa e i klam da ong u wa ynne man ko ka sien wa nyngkong heiwa da wan booh u ya ki mooyurim hadooh soo tylli ki kreh.
Da ong u wa ka Mupyut Water Supply Scheme kawa T. 7.46 klur daw ye u pynpoi umkor cha ki 412 tylli ki manyung wei kani ka Scheme toh lyngba ka JJM.
Heiyatoh wa kini ki yung skur da ong u wa ki yung skur wa daw chna daw man ki kiwa skem wei kiwa paka kiwa man katkam ka juk wa katni.
Ya ka yung skur ka Shkenpyrsit RMSA u chna ha i lut wa T. 1,27,68,000, ka Madantyrpait Govt. LP School ha i dor kamwa T. 37 lak katwa ka Mupyut Govt. LP School won ha i lut kamwa T. 37 lak.
Neiliang u Lahkmen Rymbui hawa e i klam da ong u wa i wan ymtoh wow booh du ya u mooyurim tangwa wow pyntikna leh wa u ye u pyndep ya kini ki soo tylli ki kreh chwa u Naichiphaw 2022.
Da ong u leh wa kini ki kreh toh kiwa da angnood ki paidbah na kini ki chnong iwa da slem wei ha kani ka kynti da ye wow pynman kaam ya ki wei kattu emkaam wow pyntikna wa daw ye u pyndep ya ki.
Chooh chooh da ong u wa boon ki bru wa beiñ ya kani ka sorkar tangwa kani ka sorkar ymtoh kawa pait du ya iwi i kaam donhi tangwa kawa pait liang wanang wei nadooh u snem 2018 da jied ya i stat i tip, i chait i khiah wa ka um kam kiwa kongsan tam hapoh i yahkhmat u Conrad Sangma kam u Montri Rangbah.
Heijooh i por da ong u wa hanla ka sorkar ym em poisa ko tangwa wow wanrah ya ki kaam pynroi da chim ko ya ki ram na ka sorkar India, wei lym yoh na ka ri da chim sa na baar ri khnang wow biang ki khon ki nat wa ka mynried ka jylla.
Ha kani ka sngi ya ka yalang da pynlai da ka SDEO ka West Jaiñtia Hills, ka AP Syiem heiwa da yoh ya ki kyntien pdiang burom na u Waheh Chnong ka Mupyut, da yoh leh ya i klam na u Waheh Chnong ka Madantyrpait, Shkenpyrsit katwa ka R. Kynjing da e ko ya ki kyntien khublei.
Da pynphooh ya kani ka sngi da ki chaad wa ki rwai wa da pynkhreh da ki khynnah na ki le tylli ki chnong.
