Ka yang miet wow pdiang ya u snem thymme ha chnong Jowai ynne da sariem biang ko kam ki por chwa wa em ka khlam heiwa kiwa boon ki dong da yohlaad ki wow pynman ya iwa da jooh myllien ki deiwa thang diñ Bon Fire yow yoh u yachemlang kamjooh wow sakhi ya ki pynwyrngia wei wow e khublei ya u snem warim heijooh i por wow pdiang ya u snem wa thymme.
Ha ki kattu katni ki thaw wa da yoh u sakhi ynne i miet kam ha Khimusniang, Chutwakhu, Pohskur, Mynthong wa ha Ladthadlaboh ka lehkmen da man ki kiwa phooh wa phieñ wei kiwa kyrooh dei mynsien wa kmen kmajooh i diñ.
Ha ki jar jiar ki thaw da pynman ya ki yakob wa boon jait wei da pynchit da ki rwai, ki chaad da kiwa chong chnong, ki pynyoo riam wa kiwi kiwi de.
Kamwa da pyntip, mynstep ka sngi nyngkong u snem thymme ha Jowai ym pynman ya ki lai chaad kut snem kamwa da jooh leh tangwa daw lehkmen ha ki jar jiar ki dong donhi.
Neiliang u Wyrta da chim i leh ya kani ka kabu wow e khublei snem thymme wa suk wa kmen ya phi waroh yow yoh leh dei chait i khiah wa i hoi khih hoi khan.
