Hei janmiet ka 31 tarik u Kmaichonglad ka Khlieh Mynkrem Riatsiatsim Social Club Jowai, da pynkut ko yei lehkmen dap 25 snem i lai luti yong ka, haka yalang wada wan sakhi da u MP ka Lok Sabha u Vincent H Pala, chirup i emlang u Andrew Shullai MDC, u Stephan Mukhim Ex-MLA Amlarem Constituency wa kiwi.
Haka yalang wada pynman ha Khlieh Mynkrem Community Hall wa pynlai da u L. Lakhon da yoh leh i rwai naka seiñ manbei, i klam naka M. Ryngkhlem, i e kti yaka dorkhat cha u kongsan da u K.M. Umdor.
Neiliang u Vincent hawa e yei klam da yaroh u yei lai luti kani ka Club wei yooluti haroh u kamwa thymme u snem i thij i pyrkhat leh u man i iwa thymme yow nang ye chooh chooh u lai chaphrang haki kaam wa bha.
Ong haroh u wa ha ki 25 snem i lai luti ka Club man ko leh chibynta u kynmoo tympang ya ki waheh wasian wa emkti hei lai luti ka Club kamjooh i synchaar khadar.
Najrong wa kular haroh u wow yarap pynyoh yei emkaam ka Club, pyn-ehbok ehnasib haroh u wa hanla hapyrdi i chah pynthut haka khlam ka chnong ka thaw u man hi ko kawa lai bait.
U Vincent H Pala ha kani ka sngi da pynlait haroh u yaka Souvenir i lehkmen dap 25 snem ka Club.
