Khliehriat : Hadien wada hiar u slap ka lyær boon da chah ktah ha kiwa boon bynta ka ri-loom Jaiñtia ha kani ka kynti da yoh u sakhi hadooh wa ya ki skur leh da thut i rukom krehkaam ki.
Uni u slap da ktah joor bha u ya ka Rymbai Government Secondary School kawa da sakhi yei chlai um pyn hapoh yungskur (classroom) iwa da pynbor ya ki khynnah u rieh ki neidaw wa da jæd da pai ka tnoom yung wa ki saad.
Ki manbei manpa ki khynnah ynne da pyntip ki cha u Wyrta wa ynne ka sngi hadien u slap, ki khon yong ki da haap yieñ ki charood wei da dooh ki yei chah sikai ha kani ka sngi heijooh i por da pyntip leh wa ini jia i dei langær khlieh snem.
Katkam ka yutip na ki bru wa tikna kani ka skur kiwa pyllai ya ka skur da pyntip ki dei langær cha ki bor ka Directorate Of School Education (DSEL) Shillong lyngba ka yungkrehkaam DSEO, East Jaiñtia tangwa man i iwa sepai waroh.
Heijooh i por da yoh yutip leh wa kiwa pyllai ya ka skur dei langær kyntu ki ya ka sorkar wa emkaam u chna noh ya ka yungskur wa thymme tangwa hadooh katni man i iwa dang sahteiñ ha ki chuki ki miej ki heh ki haaiñ.
“Lada ki khynnah man ki ka mynried yong i tæ kammon ye u ong wa ini i ieh khonswet ka sorkar ya kani ka skur u yoh sakhiat i ya ka mynried kawa phooh wa tyrchaaiñ” da ong uwi u manpa u wym kwah u mih pyrtuid.
Discussion about this post